Ish-ministri i Shëndetësisë, Ilir Beqaj, kërkon rikthimin e pajisjes kompjuterike (laptop) që iu sekuestrua nga SPAK me vendim të GJKKO-së.
E ndërsa u paraqit në SPAK bazuar në vendimin e GJKKO-së që i ka vendosur masën e sigurisë “detyrim paraqitje”, Beqaj në një prononcim për mediat ka pranuar se e njeh Ermal Kurtulajn prej 15 vitesh.
Kurtulaj është një nga emrat që rezulton që me urdhër të SPAK i është kontrolluar banesa, por nuk dihet nëse është nën hetim ose jo.
“Ermal Kurtulajn e njoh prej 15 vitesh. Që nga maji i 2022 ka punuar në një projekt që ndiqej edhe nga Saspaku.
Lokali Gzona nga shkurti i 2020 nuk ka asnjë lidhje financiare me familjen time. bashkëshortja ime është larguar para 4 vitesh dhe nga gjithë puna, ka marrë 1.5 milionë lekë të vjetra”, tha ai.
Ish-ministri i Shëndetësisë tha se në laptopin e sekuestruar ka materiale lidhur me sterilizimin, çështjen për të cilën është vënë nën hetim, ndërsa ndaj tij po kryhet edhe një hetim i thelluar lidhur me pasurinë.
“Kam kërkuar që laptopin të paktën të ma japin pasi kam të gjitha materialet e sterilizimit që të mund të vazhdoj komunikimin me SPAK për çështjen e sterizilimit.
Kërkoj nga drejtësia që të jetë korrekte me mua. Ka katër javë që kemi kërkuar të gjitha raportet e KLSH-së me të cilat është ndërtuar pretendimi i shkeljeve të ndryshme”, tha Beqaj.
Discussion about this post