Spartak Braho, ish-deputet i PS dhe LSI, është paraqitur ditën e sotme në SPAK. Nuk dihet nëse Braho është thirrur në SPAK për kallëzimin e bërë ndaj tij nga Rithemelimi apo për çështje të tjera.
Ndaj Brahos ka një kallëzim penal për shpifje i depozituar nga deputeti Flamur Noka, pas deklaratave që ish-deputeti bëri në media, se në përplasjen e 8 janarit 2022 në selinë e PD-së, do të vritej një deputet.
Por, pas daljes nga SPAK, Braho tha se kishte shkuar në prokurori për punë profesionale.
“Punë profesionale. Duhet zhvilluar më tej ligji për veprimtarinë e SPAK”, tha ai.
Në kulmin e përplasjeve mes demokratëve të drejtuar nga Sali Berisha dhe atyre që mbështesnin Lulzim Bashën, Braho deklaroi se një prej deputetëve të PD-së do të vritej. Braho shkoi edhe më tej kur tha se deputeti që do të vritej ishte E.A, iniciale që përputheshin me ato të Enkelejd Alibeajt, edhe pse ish-deputeti nuk i tha publikisht.
Menjëherë pas kësaj deklarate, në SPAK është depozituar kallëzimi penal ndaj tij, në emër të PD-së së drejtuar nga Berisha, ndërsa i kërkohej Prokurorisë Speciale që ta hetonte deputetin për shpifje.
Discussion about this post