Nga Zef Preçi
Nëse SPAK po çon në burg deputetin A. Bllako me argumentin e diskutueshëm se babai i tij është shpërblyer për punë të pakryer në një kompani private e cila ishte përzgjedhur nën drejtimin e tij, automatikisht nuk mund të përjashtohen edhe sqarimet e mëposhtme.
- Punimet e ndërtimit dhe administrimit të një vepër të tillë me para publike (inceneratorët) pasqyrohen në stacionet përkatëse. Dmth shpenzimet e kryera, vetëm ato që janë parashikuar në kontratën koncesionare, likuidohen (paguhen) nga buxheti i shtetit. Çdo shpenzim tjetër, që nuk është parashikuar ne koston e veprës se ndërtimit dhe menaxhimit te saj, ligjërisht nuk mund te paguhet nga buxheti i shtetit. Zyrtaret e larte te Ministrises së Mjedisit ne Komisionin hetimor deklaruan se nuk kane bere asnjë verifikim të kryerjes se këtyre shpenzimeve nen argumentin se kjo është pune e supervizoreve. Atëherë këtu lind pyetja e pare: nëse SPAK ka gjetur gjurmë dërgesash për pune te pakryer ne shumën 4 milionë Euro në rastin e ish-shefit te z. Bllako dhe rreth 150 mijë Euro për vete z. Bllako përmes pagesës së të atit për pune të pakryer, përse nuk hetohen dhe merren të pandehur supervizorët që kanë certifikuar punimet e pakryera duke dëmtuar kështu arkën e shtetit? E njëjta gjë lidhet me mungesën e plote te dy inceneratorëve, me pagesat për udhëtimet jashtë vendit, etj.
- Burime te ndryshme flasin për miliona Euro te shpenzuara për të blerë mas-median ose për të kompensuar financiarisht një numër opinionistësh si pjesë të makinerisë propagandistike te pushtetit. Nuk besoj se institucionet shtetërore psh Ministria e Ekonomisë dhe Financave të ketë qenë aq e çmendur sa të miratojnë ne koston e projekteve individuale te inceneratoreve edhe shpenzime te tilla, qofte edhe nen emrin e promocionit për te cilin rezulton se janë shpenzuar. Atehere pyetja e natyrshme është: SPAK a është duke hetuar në këtë drejtim dmth si për përgjegjësinë e palëve zyrtare të përfshira (nëse kane lejuar parashikime ne zera te tille kostoje qe nuk lidhen me qëllimin e koncesionit) ashtu edhe për detyrimin e palëve për të kthyer paratë e grabitura “me ligj” ne buxhetin e shtetit. Publikimi i një listë pagash vetëm disa muaj me pare dha mundësinë për te mësuar emra protagonistesh të mbipaguar për punë të pakryer me para buxhetore koncesionesh, por me rol jo të vogël ne helmimin e opinionit publik në favor të qeverisë…
- Për t’u kthyer te argumenti i fillimit: duke gjurmuar vetëm korrupsionin, SPAK duket se ushqen tezen e njohur te z. Rama se “hetimet nuk thonë asgjë për procedurën e cila rezulton e rregullt”, dhe po e mban stekën te “peshq” te pavlere (ndjese për alegorinë), ndërsa “peshkaqenët” e vërtetë të kësaj afere vazhdojnë të lëvizin fijet e pushtetit e ndoshta edhe teatrin e arrestimeve të derisotme. E nëse SPAK ecën në këtë drejtim, do të jetë një rruge e gjate dhe pakrye për te gjetur edhe 396 milionë Euro te tjera, përveç atyre 4 milionë Euro që thotë se i ka gjet se në cilat llogari kanë përfunduar. Në të vërtetë demi me i madh i është bërӕ buxhetit te shtetit përmes procedurës, qysh nga shpallja e emergjencës mjedisore apo nxitja e saj, ndërtimi i kompanive si rrjete merimange për te grabitur buxhetin, transferimi i parave jashtë vendit ne llogari off-shore deri te vazhdimi i pagesave edhe ne ditët e sotme. Kjo duket aq e vërtetë dhe se aq shumë dinë dhe zotërojnë informacion për zyrtare të lartë të qeverise koncesionarët ne arrati aq sa qeveria nuk guxon as te ndërpresë pagesat ne një aferë kaq te lexueshme për cilindo qytetar, votues e taksapagues te këtij vendi. Një kontrate e fituar ne rrugë korruptive apo e dyshuar si e tillë, mund të kontestohet ligjërisht dhe askush nuk do ta paralizonte shtetin shqiptar nëse vepron në mbrojtje të interesave publike.
Përtej pritshmërie të mëdha te opinionit publik për rezultate nga SPAK, mendoj së të gjithë duhet të kontribuojmë në mbështetjen e këtij institucioni, duke e konsideruar këtë mbështetje si ndërtim i urave midis shtetit dhe qytetarit, për një Shqipëri me të jetueshme.
Discussion about this post