Në Gjykatën e Lartë është hedhur shorti për shqyrtimin e kërkesës së ish-zv.kryeministres Belinda Balluku për shuarjen e masës së sigurisë “pezullim nga detyra”. Relator i çështjes është caktuar gjyqtari Ilir Panda, ndërsa dosja do të shqyrtohet në dhomë këshillimi. Ende nuk është përcaktuar data e seancës.
Balluku iu drejtua Gjykatës së Lartë pasi kërkesa e saj për heqjen e masës së sigurisë u rrëzua më herët nga Gjykata e Posaçme dhe Apeli i Posaçëm. Paralelisht me këtë proces, SPAK ka zgjeruar hetimet ndaj saj, duke e hetuar jo vetëm për shkelje në procedurat e tenderimit, por edhe për korrupsion dhe pastrim parash.
Sipas Prokurorisë së Posaçme, hetimet kanë zbuluar parregullsi në dy tendera me vlerë mbi 1 milion euro të zhvilluar gjatë kohës kur Balluku drejtonte Albcontrol. SPAK pretendon se kontratat kanë favorizuar në mënyrë të paligjshme një kompani ndërtimi, ndërsa si përfitim është marrë një vilë në Dhërmi me vlerë rreth 145 mijë euro, e cila është sekuestruar nga GJKKO. Ndërkohë, raportimet flasin edhe për një kërkesë të dytë të SPAK drejtuar Kuvendit për heqjen e imunitetit dhe autorizimin e arrestimit të saj.
Discussion about this post