Spanja njeh pasaportat e Kosovës

Zëvëndëskryeministri i Republikës së Kosovës, Besnik Bislimi, ka njoftuar se Spanja ka njohur pasaportat kosovare dhe tashmë qytetarët mund të lëvizin lirshëm drejt këtij shteti.

Përmes një postimi në rrjetet sociale, Bislimi nënvizon se Spanja i shtohet listës së vendeve të Shengenit, ku qytetarët e Kosovës mund të shkojnë pa viza që prej datës 1 janar.

“Lajmet e mira vazhdojnë. Për qytetarët tanë dhe shtetin.

DG Home ka njoftuar se tashmë edhe Spanja i njeh pasaportat e Republikës së Kosovës. Pra mund të udhëtojmë pa viza dhe drejt këtij shteti.

Ndërsa me 1 janar nisi lëvizja pa viza, Spanja është destinacion që i shtohet vendeve të zonës Shengen ku mund të udhëtojmë përmes liberalizimit, e ku pengesë më herët ishte mosnjohja e pasaportës sonë.

Vazhdojmë tutje, për të sjellë lajme të tjera të mira, e që ndikojnë pozitivisht për qytetarët tanë”, shkruan Bislimi në facebook.