Finalja e Kupës së Botës 2026 mes Spanjës dhe Argjentinës nuk do të vendosë vetëm kampionen e re të botës, por edhe fituesen e një shpërblimi rekord financiar nga FIFA.
Për edicionin e këtij viti, FIFA ka vënë në dispozicion një fond prej 871 milionë dollarësh për 48 kombëtaret pjesëmarrëse, shifra më e lartë në historinë e turneut. Paketa përfshin bonuset sipas performancës, fondet e përgatitjes dhe mbështetje shtesë për federatat.
Kampionia e botës do të arkëtojë 50 milionë dollarë, ndërsa finalistja humbëse do të përfitojë 33 milionë dollarë. Kjo do të thotë se diferenca mes fitores dhe humbjes në finalen e së dielës është plot 17 milionë dollarë.
FIFA ka rritur gjithashtu bonuset për të gjitha kombëtaret pjesëmarrëse. Çdo federatë ka marrë 2.5 milionë dollarë për përgatitjet dhe të paktën 10 milionë dollarë vetëm për kualifikimin në turne, ndërsa shpërblimet janë shtuar në çdo fazë të eliminimit.
Përfitimet nuk kufizohen vetëm te federatat. Nëpërmjet Programit të Përfitimeve për Klubet, FIFA do të shpërndajë një fond rekord prej 355 milionë dollarësh për klubet që kanë liruar futbollistët e tyre për Kupën e Botës, bazuar në numrin e ditëve që lojtarët kanë qenë në dispozicion të kombëtareve.
Përtej çmimeve financiare, triumfi në Botëror sjell edhe përfitime të mëdha komerciale, duke rritur vlerën e sponsorëve, të drejtave të marketingut dhe imazhit ndërkombëtar të federatës fituese. Për Spanjën do të ishte titulli i dytë në histori, ndërsa Argjentina synon të mbrojë kurorën dhe të fitojë Kupën e Botës për herë të katërt.
Discussion about this post