Vartësi i Emiriana Sakos, drejtori i Ujësjellësit Durrës, Spartak Kovaçi vazhdon të zhysë më thellë shoqërinë e falimentuar me tendera qindra milionë lekësh. Ndërsa Durrësi thahet për ujë në verë dhe përmbytet nga shirat në vjeshtë, Spartak Kovaçi ka tjetër axhendë, duke e nisur vitin 2024 me një goditje të re.
Duke qenë se lekët për ndërhyrje në infrastrukturë i ka vjedhur në këto vite që drejton ujësjellësin, Spartaku po nxiton që të paktën të bëjë sigurimin më mbrojtjet nga fatkeqësitë natyrore të disa godinave funksionale të ujësjellësit. Nëse do të shohim se çfarë po siguron, kjo është skandal më vete. Depove të ujit nuk u kanoset asnjë rrezik, as nga zjarri , as nga tërmeti. Por Spartaku gjeti një mënyrë për të nxjerrë lekë nga arka e varfër e shoqërisë së ujësjellësit.
Bëhet fjalë për tenderin me objekt “Sigurimi i Aseteve” me fond limit rreth 300 milionë lekë. Në dokumentet e tenderit shohim se bëhet fjala për sigurimin e disa depove të ujit dhe godinave të tjera në disa zona periferike të Durrësit.
Gara për këtë tender është hapur më datë 7 dhjetor 2023 dhe gjatë kohës që afati ka qenë i hapur është paraqitur vetëm një ofertë, nga firma Atlantik – Shoqeri Sigurimesh, në pronësi të Dritan Çelajt.
Në këto raste ligji kërkon që procedura të anulohet ose gara të hapet sërish, por vartësi i Sakos nuk i respekton rregullat se i ka krahët e ngrohta. Kështu duke garuar me veten e saj, firma Atlantik – Shoqeri Sigurimesh u shpall menjëherë fituese. Dhe menjëherë, Open Data i ka vendosur “Flamurin e kuq”, për mungesë konkurrence dhe shkelje të hapur të ligjit. Kjo është shenjë që tregon riskun e lartë të korrupsionit.
I njëjti tender, dy vjet më parë ka kushtuar dy herë më pak. Kështu në vitin 2021 “Sigurimi i aseteve” të Ujësjellësit kushtoi 158 milionë lekë, sipas dokumentit të mëposhtëm:
Si u rrit çmimi i sigurimit kaq shumë në dy vjet? Këtë “mrekulli” ekonomike që pasuron shoqërinë e sigurimit, mund ta shpjegojë vetëm Spartak Kovaçi.
Lidhjet me Ilir Metën
Dritan Çelaj është në listën e gjatë të biznesmenëve që pasurohen përmes tenderëve pa garë që marrin nga kryebashkiakët, dhe që paguhen nga taksapaguesit. Ndërsa dihet se ka edhe lidhje të forta në sferën politike që ja shtrojnë rrugën gati për tek fondet e buxhetit të shtetit.
Dritan Çelaj është vëllai i Flamur Çelajt, ish-deputet i LSI së Ilir Metës dhe Monika Kryemadhit.
Çelaj përflitet si pjesë e rrethit të biznesmenëve që qarkullojnë dhe pastrojnë paratë e Ilir Metës dhe Monika Kryemadhit, por kjo mbetet për t’u provuar nga organet ligjzbatuese.
Lidhja me mafien bullgare
E përfolur është lidhja e Dritan Çelajt me kokën e mafies bullgare, Jeko Petkov Kolev, i cili ka një histori pastrimi parash dhe grabitje të pasurive publike në Shqipëri, pikërisht me biznesmenin pranë Ilir Metës.
Bullgari ishte administrator i kompanisë Riviera Kakome të Dritan Çelajt dhe Luan Lekës, me të cilën po tentojnë të rrëmbejnë Gjirin e Kakomesë, një dosje ende e pandëshkuar nga drejtësia.
Jeko Petkov Kolev është akuzuar nga amerikanët si përfaqësues dhe bosi i mafies bullgare, si dhe i lidhur me oligarkët rusë.
Pas mafiozit bullgar fshihen oligarkë dhe mafiozë rusë, të cilët kanë qenë gjithnjë nën monitorimin e shërbimeve inteligjente amerikane dhe vendase për investime në Shqipëri, përmes bashkëpunimeve me biznesmenë shqiptarë.
Situata financiare e Ujësjellësit të Durrësit
Keqadministrimi ka çuar në faliment Ndërmarrjen e Ujësjellësit Durrës (UKD), një nga më të mbështeturat me hua dhe grante nga donatorët. Vendimi për likuidimin e shoqërisë u mor me 15 maj të këtij viti pasi ndërmarrja e qytetit bregdetar ishte zhytur në borxhe dhe nuk kishte me asete, thuhet në raportin që Asambleja e Aksionareve të Shoqërisë ka bërë për falimentin.
Të dhënat nga bilanci tregojnë se humbjet UKD-së u dyfishuan gjatë vitit të kaluar duke arritur në mbi 1 miliardë lekë afërsisht 10 milionë euro, nga 535 milionë lekë (5 mln euro) që ishin në vitin 2021, sipas të dhënave të raportuara në bilancin zyrtar të dorëzuar në Qendrën Kombëtare të biznesit.
Performanca e kompanisë është rënduar se tepërmi gjatë vitit 2022, kur detyrimet totale arritën në 16 miliardë lekë më shumë se 150 milionë euro me rritje 11 për qind ndaj vitit 2021, ndërkohë që kapitali ishte negative prej 2.8 miliardë lekësh, duke treguar një gjendje tepër të rënduar financiare.
Ndërkohë, sipas burimeve, SPAK ka nisur hetimin për Spartak Kovaçin, të cilit i është sekuestruar telefoni dhe kompjuteri. Nuk kuptohet përse lejohet të vazhdojë i qetë të përvetësojë fondet e shoqërisë së falimentuar.
Discussion about this post