Partia Social-Demokrate (SPD) e qendrës së majtë, ka fituar zgjedhjet federale në Gjermani, duke mposhtur partinë e kancelares Angela Merkel. SPD ka siguruar 25.7 për qind të votave, derisa blloku konservator i Merkelit, Demokrisian/Kristian-Social (CDU/CSU), ka siguruar 24.1 për qind. Partia e Gjelbër ka shënuar rezultatin më të mirë në historinë e partisë, duke u renditur e treta me 14.8 për qind të votave. Një koalicion është i domosdoshëm për të krijuar qeverinë. Sondazhet parashikuan garë të nxehtë, mirëpo këto zgjedhje dolën jashtë paparashikimeve.
Megjithatë, kancelarja në ikje nuk do të largohet derisa të formohet qeveria – dhe kjo gjë mund të vonohet deri në kohën e Krishtlindjes. Detyra e pasardhësit të Merkelit është që të udhëheqë ekonominë më të madhe në Evropë në katër vitet e ardhshme.
Scholz i ka thënë një audience televizive se votuesit i kanë dhënë atij detyrën e “formimit të një qeverie të mirë dhe pragmatike për Gjermaninë”. Rivali i tij konservator, Armin Laschet, ka reaguar, po ashtu, duke thënë se ky proces është për formim të koalicionit dhe jo për “shumicë aritmetike”.
Partia e krahut të majtë, Die Linke, mund edhe të mos jetë më në parlament, nëse rezultati i saj zgjedhor bie nën 5 për qind. Ndonëse partia e ekstremit të djathtë, Alternativa për Gjermaninë, duket se ka shënuar ulje në nivel kombëtar, ajo ka dalë partia më e madhe në landet gjermane, Saksoni dhe Turingia.
