Ish-kreu i Lidhjes Demokratike të Kosovës, Isa Mustafa, e ka vlerësuar lartë iniciativën e qeverisë shqiptare për hartimin dhe aprovimin e një Rezolute kundër raportit të Dick Martyt. Në një intervistë televizive, Mustafa ka thënë se raporti i senatorit zviceran ka rezultuar i pavërtetë dhe me pasoja për Kosovën, prandaj ish-kryeministri Mustafa potencon se Rezoluta në Kuvendin e Shqipërisë është në anën e të vërtetës, anë kjo në të cilën duhet të rreshtohen edhe institucionet e Republikës së Kosovës.
“E vlerësoj si një veprim shtetëror të përgjegjshëm dhe të bazuar. Raporti i Dick Martit atakon UÇK-në – Kosovën dhe Shqipërinë lidhur me trafikimin e organeve njerëzore, gjë që ka rezultuar i pavërtetë dhe shumë i dëmshëm. Prandaj rezoluta e Kuvendit të Shqipërisë është në anën e së vërtetës. Edhe institucionet e Kosovës duhet të rreshtohen kah e vërteta”, ka thënë Mustafa për Gazetën Express.
Tutje Mustafa ka pasur disa fjalë edhe për presidenten e vendit, Vjosa Osmani, e cila ka thënë se nuk duhet harruar se kush kishte insistuar dhe kush kishte bërë presion për themelimin e Gjykatës Speciale. Isa Mustafa ka thënë se nuk është e vërtetë që e kanë shtyrë përpara themelimin e Gjykatës Speciale njerëzit që sot po mbahen në paraburgim në Hagë. Ish-kryeministri thotë se është papërgjëgjësi të thuhet një deklaratë e tillë nga liderët e Kosovës.
Mustafa thotë se Specialen e kanë shtyrë përpara ndërkombëtarët dhe se të njëjtit janë shprehur qartë që nëse nuk e bën Kosova do të themelohet një gjykatë nga Këshilli i Sigurimit me nismën e Rusisë dhe Kinës dhe se një gjë e tillë nuk do të kundërshtohet nëse Kosova nuk e themelon. “Duhet të theksoj se nuk është e vërtetë se njerëzit që sot po gjykohen mbi bazën e Raportit të Dick Martit dhe deputetëve rus, janë ata që e kanë shty përpara themelimin e Gjykatës Speciale. Është e papërgjegjshme të thuhet kështu nga liderët e Kosovës. Gjykatën e kanë shty përpara ndërkombëtarët. Janë shprehur qartë, ose themelone ju ose do ta themelojë Këshilli i Sigurimit me iniciativë të Rusisë dhe të Kinës, dhe se këtë iniciativë nuk do ta kundërshtojmë në qoftë se ju nuk e themeloni”, ka thënë Isa Mustafa për Gazetën Express.
Mustafa teksa përmend presionin ndërkombëtar, thotë se Gjykata Speciale nuk është themeluar pse ka bërë presion Hashim Thaçi, por se është krijuar si rezultat i presionit të SHBA-së dhe BE-së për të shmangur përfshirjen e Rusisë në caktimin e mandatit, fushëveprimit dhe kohëzgjatjes së saj.
Discussion about this post