Superiorja ditën e sotme do të luajë 3 ndeshjet e tjera të javës së 30-të të kampionatit. Takime mjaft interesante dhe të luftuara janë në program për t’u zhvilluar në 2 orare të ndryshme.
Gjithçka do të ngre siparin e ditës së sotme me duelin mes Bylis dhe Laçit, takim që do të startojë në orën 15:30 dhe do të zhvillohet në “Adush Muça”. Një duel direkt për mbijetesë mes dy skuadrave që synojnë vetëm fitoren për t’iu larguar sa më shumë zonës së ftohtë.
Ndërkohë në orën 18:00 do të luhet paralelisht në Elbasan dhe Tiranë. Në “Elbasan Arena” do të sfidohen mes tyre Elbasani dhe Dinamo. Një tjetër duel mjaft delikat, me vendasit që synojnë të blindojnë vendin e tyre në klasifikim, ndërsa dinamovitët për të ngushtatuar akoma më shumë diferencën me Egnatian e vendit të parë.
Në 3 takimet e fundit mes tyre që janë dhe të vetmet që kanë zhvilluar mes tyre, “Blutë” kanë arritur 3 fitore të rëndësishme. Por pavarësisht se elbasanasit nuk ia kanë dalë të sigurojnë fitore përballë ekipit të Ilir Dajës, sërish në shtëpi kanë treguar se janë një skuadër e vështirë.
Dinamovitët kanë arritur të shënojnë 10 gola në portën e verdhebluve, ndërsa nga ana tjetër ekipi i Ivan Gvozdenvoic ka mundur të gjejë rrugën e rrjetës ndaj “Bluve” vetëm 2 herë. Gjithsesi kjo ndeshje premton një luftë të ashpër për 90-të minuta, pasi çdo pikë do të jetë vendimtare në luftën e ekipeve drejt objektivave të tyre sezonalë.
Gjithashtu në Tiranë do të përplasin “brirët” mes tyre Partizani dhe Teuta. Të kuqtë do të tentojnë të vazhdojnë me serinë e fitoreve në kampionat, ndërsa durrsakët të gjendur në vendin e fundit të vetmen zgjidhje kanë 3 pikët.
Discussion about this post