Vetëm pak ditë pasi zyrtarisht mori detyrën si Ministre për Evropën dhe Punët e Jashtme, Elisa Spiropali është futur me hov në botën e madhe të diplomacisë… ose më saktë, në botën e fotove të bukura në korridoret e OKB-së.
Që prej 23 shtatorit, Spiropali ka nisur turneun e saj të “intensiv” diplomatik në New York. Postimet në rrjetet sociale janë me shumicë, aq sa ndonjë ndjekës mund të mendojë se Shqipëria po udhëheq Këshillin e Sigurimit dhe G7-ën njëherësh. Por në realitet, pjesa më e madhe e angazhimit të ministres duket se konsiston në shtrëngime duarsh spontane, buzëqeshje të detyruara në oborr, apo selfie me ndonjë lider që nuk e kupton mirë pse po fotografohen.
23 shtator – Ministrja e veshur me të bardha nis ditën me një foto nga ballkoni i hotelit, më pas një video nga selia e OKB-së dhe në fund një postim në tryezën e përbashkët.
24 shtator – E veshur me të zeza, përkrah presidentit Begaj, del në video në oborrin e OKB-së. Në një tjetër postim shfaqet pranë Begajt teksa dëgjojnë fjalimin e Donald Trump. Pak më vonë, në një tjetër foto, Spiropali shfaqet pa Begajn në krah, duke ndarë imazhe nga takimi rastësor me Zelenskin.
25 shtator – Në korridoret e OKB-së, Spiropali është parë duke përshëndetur presidentin e Austrisë, Alexander Van der Bellen, dhe ministren austriake të Jashtme, Beate Meinl-Reisinger. Të dyja përshëndetjet meritonin një postim në faqen zyrtare të ministres.
Më vonë, një tjetër postim për Grupin e Miqve të Ballkanit Perëndimor, organizuar nga Antonio Tajani, ku ishte edhe Roberta Metsola.
Një tjetër postim iu kushtua takimit me sekretarin amerikan të Shtetit, Marco Rubio, të cilin e takoi në një tryezë të përbashkët.
Në listë u shtuan edhe një foto me Richard Grenell, si dhe foto nga një konferencë kundër ekstremizmit e organizuar nga Johann Wadephul në krah të ministrave të Jashtëm gjermanë.
Takimi i vetëm i vërtetë – Pas gjithë kësaj “maratone” fotosh në oborre e korridore, duket se i vetmi takim real, i ulur në një tryezë pune, ishte ai me homologen kosovare Donika Gërvalla. Të dyja, për koincidencë, të veshura kuq e zi.
Në vetëm disa ditë në Asamblenë Parlamentare të OKB-së, Elisa Spiropali ia ka dalë të promovojë garderobën e saj korridoreve të Asamblesë. Aq sa duhet, në fakt, për të mbushur Facebook dhe Instagramin e propagandës së diplomacisë së vakët shqiptare.
Në fund të ditës, Spiropali nuk e shpiku diplomacinë e oborrit – thjesht po e praktikon me pasion. Me pak fjalë: më pak marrëveshje, më shumë foto. Sepse siç duket, në diplomacinë shqiptare të shekullit XXI, më shumë vlen një selfie me sfond ndërkombëtar, sesa një marrëveshje me përmbajtje reale.
Discussion about this post