Komisioni i Prokurimeve Publike ka kapur në shkelje tenderin e hapur nga Spitali Memorial i ndërtuar nga Erdogani në Fier. Bëhet fjalë për tenderin me objekt “Evadimi i mbetjeve spitalore”, që mban numrin e referencës REF-24972-04-13-2022, me datë 9 qershor të këtij viti. Por, duke qenë se kontrata ka një sërë shkeljesh ligjore, Open Data Albania e ka klasifikuar me “Flamur të Kuq”. Nga monitorimi u evidentua se tenderi i është dhënë kompanisë “ECO RICIKLIM” pa garë të mirëfilltë. Gjatë hapjes së thirrjes kanë shfaqur interes 3 kompani, por dy prej tyre edhe pse me ofertën më të ulët janë skualifikuar me justifikimin se nuk kanë deklaruar numrin e automjeteve që kanë në dispozicion. Kështu në garë mbeti vetëm “ECO RICIKLIM”. Pavarësisht se këto shkelje u evidentuan në media asnjë nga institucionet përgjegjëse nuk mori nën hetim këtë kontratë.
Në këtë kuadër, një nga operatorët e skualifikuar padrejtësisht ka denoncuar tenderin në Komisionin e Prokurimeve Publike. Denoncimi është bërë me datë 11 tetor nga “V.A.L.E. RECYCLING” SHPK, e cila shprehet se në një nga pikat e kontratës kërkohet që; “Operatori ekonomik duhet të paraqesë një kontratë të lidhur me një landfill te 3 licencuar për depozitimin e produktit final që del nga asgjësimi/trajtimi, e cila duhet të jetë aktive dhe e vlefshme në momentin e hapjes së ofertave.”, por që nuk përcaktohet qartë se çfarë lloj produktesh dalin nga spitali, për të cilat operatorët duhet të lidhin kontratë me landfillin.
Sipas ankimuesit kodet e produkteve nuk janë paraqitur për shkak se, këto i dinte mirë vetëm kompania “ECO RICIKLIM”, e cila ka qenë e paracaktuar si fituese, ndërsa gara është bërë në mënyrë fiktive. KPP pasi ka analizuar të dhënat e këtij tenderi ka dalë në konkluzionin se kontrata ka shkelje të konkurrencës dhe kriteret janë të paqarta. Për këtë arsye, duke mbështetur pretendimit e ankimuesi, KPP shprehet se “Autoriteti kontraktor duhet të hartojë dhe të përcaktojë kërkesat e veçanta për kualifikim në mënyrë më të qartë duke përcaktuar kodin e produktit final që del nga trajtimi i mbetjeve spitalore dhe që do të depozitohet në landfill”.
Komisioni i Prokurimit Publik në arsyetimin e tij shkon akoma më tej duke sqaruar se, bazuar në vendimin e Këshillit të Ministrave nr. 402, datë 30.06.2021 “Për miratimin e katalogut të mbetjeve”, autoriteti kontraktor nuk ka përcaktuar kodet e mbetjeve, duke krijuar paqartësi si për operatorët ekonomikë dhe kështu i ka vënë ato në kushte te pabarabarta, përball kritereve diskriminuese. Në përfundim komisioni i kërkon Spitalit Memorial Fier që të anulojë tenderin, të rishikojë dokumentet dhe rivlerësojë edhe njëherë ofertat e paraqitura nga të gjithë operatorët.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post