Këshilli i Ministrave zyrtarizoi bashkëpunimin për tre vitet e ardhme me Turqinë, përsa i përket administrimit të Spitalit Memorial në Fier, duke krijuar kështu modelin e parë të autonomisë spitalore në vendin tonë.
Ky duket se nuk do të jetë rasti i parë dhe i vetëm pasi ministrja e Shëndetësisë, Ogerta Mnasatirliu theksoi se modeli i autonomisë spitalore do të replikohet dhe në të tjera qendra shëndetësore.
Sipas Manastirliut, bashkëpunimi me shtetin turk do të jetë në dobi të qytetarëve shqiptarë, kjo lidhur me cilësinë e shërbimit që do të iu ofrohet atyre.
Kujtojmë se Spitali Rajonal Memorial në Fier i ndërtuar me mbështetjen financiare të Turqisë, u inaugurua më 21 prill të këtij viti me pjesëmarrjen e zyrtarëve të lartë nga Turqia dhe Shqipëria, përfshirë edhe presidentin e Turqisë, Recep Tayyip Erdoğan, nëpërmjet videokonferencës.
Sipas të dhënave zyrtare nga Ministria Shëndetësisë dhe Mbrojtjes Sociale e Shqipërisë, Spitali Rajonal Memorial në Fier u ofron shërbim shëndetësor rreth 330 mijë banorëve të zonës së jugut dhe se gjatë 5 muajve të funksionimit të këtij spitali janë ofruar 16 lloje shërbimesh shëndetësore dhe kryer rreth 22 mijë ndërhyrje mjekësore, vizita, ekzaminime për qytetarët.
Sipas ministrisë, në këtë spital publik aktualisht janë 257 staf i përbashkët shqiptaro-turk që ofron shërbim dhe janë më shumë se 75 mjekë dhe infermierë turq, të cilët përgjatë 5 muajve të parë të funksionimit janë vendosur pranë këtij spitali.
Discussion about this post