Në spitalin e qytetit të Bajram Currit mungojnë mjekët specialistë, ndaj banorët detyrohen të shkojnë në qytetin e Gjakovës, për vizita mjekësore por dhe nderhyrje kirurgjikale.
“Në Tropojë s’ka mjekë! Ne shkojmë në Gjakovë kur jemi sëmurë. Ata janë mjek të mirë dhe ne e kemi afër ndaj shkojmë atje”, tha një e moshuar.
“Mos me qenë spitali në Gjakovë ne vdesim të gjithë. Që kur është hap kufiri ne e marrim shërbimin atje. Shkojmë për çdo gjë, si për spital ashtu dhe për tregti. Çdo gjë atje është më lirë e më mirë. Këtu s’ka mjek, s’ka asgjë”, tha një tjeter banor.
Drejtori i spitalit, Kujtim Rexha pranon mungesën e stafit mjekësor ndërsa është shprehur se ka bërë kërkesë në Ministrinë e Shendetesise për mjekë specialiste, sidomos per kardiolog, pediatër, reanimator por s’kanë gjetur zgjidhje.
“Në këtë periudhë të shkurtit ka pasur fluks në spital për shkak të virozave. Por ka dhe raste me Covid-19. Paraqiten 70 urgjenca në ditë dhe deri më tani ia kemi dalë, e kemi përballuar normalisht. Rastet e rënda i çojmë në Gjakovë ose në Tiranë sipas komplikacioneve. Ne kemi bashkëpunim shumë të mirë, ndër vite me spitalin e Gjakovës, na kanë pritur pacientët sepse ata janë spital i kompletuar me staf mjekësor. Në ditë mund të shkojnë 5-6 pacientë në Gjakovë. Ne prej disa vitesh kemi mungesë mjekësh në spitalin tonë, sidomos për kardiolog, pediatër, reanimator, etc. Në total kemi 9 mjeke, prej të cilëve 5 të përgjithshëm dhe 4 mjekë specialistë. Kemi kërkuar here pas here në Ministrinë e Shëndetësisë për specialistë, sidomos për kardiolog por s’kemi gjetur zgjidhje”, tha drejtori i spitalit.
Spitali në qytetin e Bajram Currit i shërben rreth 30 mijë banorëve të Bashkisë së Tropojës dhe aktualisht ka 9 mjekë, prej tyre vetem 4 specialiste. Për shkak të mungesës së stafit janë të angzhuar edhe mjekë pensionistë.
Discussion about this post