Tragjedia e madhe që ndodhi ditën e sotme në Tetovë, pasi spitali ku po trajtoheshin pacientët me COVID u përfshi nga flakët dhe shkaktoi mbi 20 viktima, ka patur shqetësime nga mediat ditë më parë për ndërtimin e tij. Pikërisht ky spital, siç u raportua më parë nga mediat vendase, kishte probleme në ndërtim dhe nuk duhej të ishte vënë në përdorim.
Më 15 prill të këtij viti, në media doli lajmi se spitali në Tetovë kishte probleme dhe se kompania kontraktore duhet që të ndërhynte. Kështu informonte mediat atëherë drejtori ekonomik i Spitalit Klinik të Tetovës, Artan Etemi.
Kompania “Brako” kishte paguar tashmë për shumicën e instalimit të spitaleve dhe pajisjet e tyre, duke marrë 3.62 milion euro. Pas konstatimit të problemeve, kompania “Brako”, e cila është pranë qeverisë, u tha mediave se ata e kishin kryer punën e tyre dhe se nuk kishin konstatuar asnjë problem.
