Disa kohë më parë Aurela Gaçe zbuloi momentin më të vështirë që iu është dashur të kalojë ndonjëherë: rreziku për të humbur përgjithmonë zërin e saj. Pas kësaj deklarate, në media u krijua një zhurmë e madhe duke keqinterpretuar fjalët e këngëtares, sikur do të tërhiqej përgjithmonë nga muzika. Megjithëse ka reaguar edhe më herët, ajo vendosi t’i rikthehej kësaj situate në një intervistë të dhënë së fundmi.
E pyetur nga gazetari i “21 Media” nëse ka pasur raste që i është dashur të anulojë ndonjë performancë, këngëtarja tha:
“Ka ndodhur që e kam bërë në maj në Amerikë. Vija pas një sezoni të fuqishëm në Tiranë ku vë shumë energji, dhe mbase isha pak e tejet lodhur dhe mjekja atje më këshilloi që të merrja 10 ditë pushim. Unë e thashë që do bëja pushim, mediat e bënë që Aurela lë muzikën, ore këtu më keni mua, nuk ju ndahem unë.”
Intervista e shkurtër u zhvillua para një koncerti që Aurlea mbajti në Maqedoni, ku këngëtarja këndoi si gjithmonë live. Duke pasur parasysh ‘trendin’ e këngëtarëve të tjerë që shpesh në koncertet këndojnë ‘playback’, artistja u pyet se pse i qëndron besnike traditës së të kënduarit live.
“Në të gjithë botën nuk është ndonjë çudi e madhe që artisti të këndojë live. Ti shkon shikon ndonjë ndeshje futbolli ose boski? Çfarë do bëje nëse boksieri do ta kishte pre-regjistruar ndeshjen ti të paguaje biletën dhe ai të bënte sikur i binte. Unë bëj detyrën që bën çdo artist përderisa e do muzikën, për të tjerët duhet të pyesësh të tjerët, unë flas për veten time. Është detyra që duhet të bëjë secili nga ne.”
Ndër të tjera ajo komentoi edhe artistët e rinj, ku shprehu se “i marrim nga bota, frymëzohemi dhe bëjmë muzikë.”
“Ajo është me breza. Kur kam qenë unë e vogël ka qenë një brez tjetër. Erdhëm ne të viteve 90, Adelina Ismajli, Aleksandër Gjoka… por ishte një frymë tjetër. Pra i bie njësoj sikur të na shanin ne ata të vjetrit. Kështu që çdo brez evulon në mënyrën e vet. Unë mendoj që ne jemi marrës shumë të mirë të energjive të botës, i marrim nga bota, frymëzohemi dhe bëjmë muzikë.”
Por pavarësisht se u tregua e kujdesshme në përgjigjen e saj për artistët e rinj, Aurela nuk la pa ironiziuar klikimet e tyre. Duke folur për këngën e saj të re, ajo tha se është pritur mirë por shtoi se nuk ka shumë klikime pasi ajo nuk i ka blerë.
“Pritet shumë mirë. Nuk i kam ato klikimet sepse nuk kam lekë që t’i hedh për të blerë ato klikime. Apo s’duhet ta thoja këtë? Lekët i hedh në performancë, në punë. Nuk kam nevojë ti mbush mendjen askujt nëse jam e suksesshme ose jo sepse shumë mirë kudo që shkoj publiku më pret shumë mirë”.
Discussion about this post