Federata Shqiptare e Futbollit vijon me ritme intensive investimet në infrastrukturën sportive në kuadër të përgatitjeve për organizimin e finaleve të Kampionatit Europian U-21 2027, që Shqipëria do të presë si një nga vendet bashkëorganizatore.
Punimet në stadiumin “Arena e Demave” po avancojnë sipas planifikimit, ndërsa është në zhvillim ndërtimi i fushës së re hibride, një investim i rëndësishëm që do ta sjellë impiantin në standardet e kërkuara për zhvillimin e ndeshjeve ndërkombëtare.
Pas heqjes së plotë të tapetit të vjetër artificial, po punohet për realizimin e rikonstruksionit të bazamentit të fushës dhe po punohet për sistemin modern të vaditjes, një fazë thelbësore për garantimin e cilësisë dhe jetëgjatësisë së tapetit të ri. Në fazën tjetër do të kryhet vendosja e tapetit hibrid, e ndjekur nga mbjellja e barit natyral. Sipas parashikimeve, fusha e re do të jetë gati brenda pak muajsh për të pritur ndeshje zyrtare.
Paralelisht me stadiumin, puna vijon edhe në dy fushat stërvitore të kompleksit “Arena e Demave”, të cilat do të shërbejnë si impiante mbështetëse për ekipet pjesëmarrëse në Europianin U-21 2027, por edhe për zhvillimin afatgjatë të futbollit në vend.
Në fushën me bar natyral me përmasa standarde, Federata Shqiptare e Futbollit do të financojë ndërtimin e sistemit të vaditjes, mbjelljen e barit si edhe pajisjen me porta. Ndërkohë, në fushën tjetër me përmasa standarde do të vendoset tapet artificial i gjeneratës së fundit, gjithashtu i financuar nga FSHF, së bashku me instalimin e një seti portash.
Ky investim është pjesë e programit të gjerë të FSHF-së për modernizimin e infrastrukturës futbollistike në Shqipëri dhe përmbushjen e standardeve të UEFA-s, duke garantuar kushte bashkëkohore për zhvillimin e ndeshjeve ndërkombëtare, aktiviteteve kombëtare dhe stërvitjes së futbollistëve.
Me investimet që po realizohen në stadiumet dhe qendrat stërvitore në të gjithë vendin, Federata Shqiptare e Futbollit po ndërton një trashëgimi infrastrukturore që do t’i shërbejë jo vetëm organizimit me sukses të finaleve të UEFA European U-21 2027, por edhe zhvillimit të futbollit shqiptar për shumë vite në vijim.
Discussion about this post