Statistikat e turizmit: Ti dukesh nga kafka që je shqiptar!

Nga Artan Fuga

Statistikat nuk janë estradë.

Pashë me interes faktin që ministria e Turizmit kishte botuar statistika për numrin e turistëve që kanë vizituar parqet natyrore të atdheut.

Shumë mirë, thashë me vete. Por, mirë numrin e vizitorëve ndofta e kanë gjetur nga numri i biletave në hyrje, thashë me vete, por sa të zgjuar janë, paskan gjetur edhe sa kanë qënë të huaj dhe sa të jashtëm midis vizitorëve.

Mirë që nuk kanë gjetur sa burra, sa gra, sa myslimanë, sa të krishterë, sa laikë, sa të sëmurë me diabet, sa me simptoma reumatizmale!

Përsëri ia shkrepa gazit!

Si e kanë gjetur mer jahu, sa shqiptarë, sa të huaj, se edhe unë merrem me statistika sociologjike.

Mos bëjnë gomarllëkun dhe u kërkojnë pasaportat vizitorëve?!

I njohin shitësit e biletave nga profili i tyre antropologjik, vizitorët? Ti dukesh nga kafka që je shqiptar!

I pyesin në hyrje: “Where are you from”?!

Aman, si i dalloni? Apo ka bileta me çmime të ndryshme për shqiptarë dhe të huaj? Mos o Zot! Mbaju dorën!

Po ato familje, ku njeri është shqiptar, tjetri i huaj, ku e fusni? Po shqiptarin me shtetësi të huaj ose dyshtetësi? Ku e fusin?

Aman mort, se këto statistika me kaq nuanca nuk ka as “British Museum”, as “Louvre”!