Ardhja e emigrantëve në Itali është rritur me më shumë se 50% që kur kryeministrja e ekstremit të djathtë Giorgia Meloni mori detyrën në fund të tetorit të kaluar. Këtë të dhënë e faktojnë statistikat zyrtare të cilat kundërshtojnë pretendimet e bëra nga qeveria e saj.
Të hënën, ministri i brendshëm Matteo Piatendosi pretendoi se “kurba e rritjes (e mbërritjeve me anije) kishte rënë” në dy muajt e parë të qeverisë në pushtet.
Por statistikat e publikuara nga ministria e brendshme dhe të rishikuara nga Euronews, tregojnë se ardhjet e emigrantëve me anije kanë qenë dukshëm më të larta që kur Meloni mori detyrën në krahasim me të njëjtën periudhë të një viti më parë.
Dy muajt e parë të plotë të kryeministres të ri në detyrë, nëntor dhe dhjetor, panë pothuajse 20,000 emigrantë që erdhën me anije, një rritje e ndjeshme krahasuar me atë të një viti më parë, kur kishte 12,600 zbarkim emigrantësh.
Rritja e mbërritjeve me anije në dhjetë ditët e para të 2023 ka qenë edhe më dramatike: 3,709 deri më tani këtë vit krahasuar me vetëm 378 në të njëjtën periudhë kohore në 2022, duke shënuar një rritje prej 881%.
Edhe pse e djathta italiane shpesh e ka drejtuar gishtin drejt rolit të organizatave joqeveritare (OJQ) për të ndihmuar emigrantët të zbresin në tokën italiane, studimet zyrtare sugjerojnë se roli i tyre është zvogëluar gjatë dekadës së fundit.
“Nga tetori [2022], OJQ-të kanë shpëtuar më pak se 10% të emigrantëve që kanë arritur në Itali,” tha Matteo Villa, një studiues në institutin e mendimit ISPI, i cili foli me HuffPost Italia.
Në vitin 2016, gati 45% e emigrantëve që mbërritën në Itali ishin ndihmuar nga një OJQ, raportohet nga te dhënat statistikore.
Meloni dhe partia e saj Vëllezërit e Italisë dolën triumfuese në zgjedhjet e përgjithshme të parakohshme të shtatorit të kaluar, duke udhëhequr një fushatë e cila premtoi të frenonte mbërritjet e anijeve dhe të mbante një qëndrim të ashpër ndaj imigracionit të paligjshëm.
Discussion about this post