Sytë e të gjithë shqiptarëve këtë të hënë do të jenë të kthyer nga Tbilisi, aty ku kombëtarja shqiptare e futbollit do të përballet me Gjeorgjinë.
“Kuqezinjtë” do zbresin në stadiumin “Mikheil Meskhi” në orën 18:00, për t’u përballur në kuadër të raundit të katërt të Ligës së Kombeve.
Shqipëria vjen në këtë takim pas dy humbjeve radhazi në Ligën e Kombeve dhe ndaj gjeorgjianëve do të kërkohet kthesa.
Teksa, pas një disfate vijnë edhe kundërshtarët e “kuqezinjve”, me Gjeorgjinë që në sfidën e fundit u mposht nga Ukraina dhe pritet që këtë të hënë të japin maksimumin.
Skuadra e Sylvinho-s mbërriti në Gjeorgji pas dy ndehsjeve pa shënuar dhe qëllimi është që të shmang ndeshjen e tretë radhazi pa gol dhe mbi të gjitha pa pikë.
Por si flasin statistikat e përballjeve mes Gjeorgjisë dhe Shqipërisë?
Kombëtarja shqiptare e futbollit është përballur 16 herë në histori me ekipin e Gjeorgjisë në të gjitha kompeticionet, me takimin e parë mes tyre që daton më 12 dhjetor të 1994-ës.
Në 16 ndeshje mes tyre, statistikat flasin më mirë për gjeorgjianët, që numërojnë nëntë fitore, katër takime janë mbyllur në barazim dhe vetëm tre ndeshje i ka fituar Shqipëria.
Ndërsa vlen të theksohet se nga pesë ndeshje që Gjeorgjia i ka luajtur në shtëpi, i ka fituar të gjitha, një stastistikë aspak pozitive kjo për “kuqezinjtë”.
Shqipëria renditet aktualisht në vendin e tretë të Grupit 1 në Ligën B, me tre pikë dhe “kuqezinjve” u duhet patjetër një fitore ndaj gjeorgjianëve, teksa këta të fundit vijnë si kryesues të grupit me gjashtë pikë.
Discussion about this post