Statuti i PD-së së Bashës, kryetari merr në kontroll gjithçka

Kreu i PD-së do të jetë edhe kryetar i Grupit Parlamentar. Ky është një nga ndryshimet statutore që është propozuar në PD-në zyrtare e cila drejtohet nga Lulzim Basha.

Por, sipas ndryshimeve të propozuara, kryetari mund të caktojë edhe një prej nënkryetarëve për të drejtuar Grupin Parlamentar.

Me ndryshimet e propozuara, Lulzim Basha do të jetë edhe kryetari i Grupit parlamentar, post që e mbante Gazment Bardhi.

Gjithashtu, sipas ndryshimeve të propozuara Bordi Financiar drejtohet nga Kreu i partisë, ndërsa nënkryetarët e saj zgjidhen nga Këshilli Kombëtar.

Një tjetër ndryshim ka të bëjë me rastin e humbjes së zgjedhjeve, kur kryetari, nuk detyrohet të dorëhiqet në rast humbjeje.

Në statutin e ri të PD-së së Bashës thuhet se ngritja ose shkrirja e një dege partie bëhet vetëm me vendim të Kryesisë së partisë.

Gjithashtu propozohet krijimi i Komitetit të Qarkut, strukturë e cila aplikohet për herë të parë në PD.

Sekretari i Përgjithshëm është përgjegjës për organizimin e partisë, ndërsa përjashtohen si anëtarë partie ata që kanë kandiduar për subjekte të tjera në zgjedhje.

Neni 48

GRUPI PARLAMENTAR i PARTISË

1) Grupi Parlamentar i PDSH-së përbëhet nga deputetët e saj në Kuvendin e Shqipërisë.

2) Kur PDSH është shumicë qeverisëse, Kryetari i Grupit Parlamentar zgjidhet me propozim të Kryetarit të Partisë nga Këshilli Kombëtar, me votim të fshehtë, ndërmjet jo më pak se dy kandidaturave.

3) Kur PDSH nuk është shumicë qeverisëse, Kryetari i Partisë është edhe Kryetar i Grupit Parlamentar. Kryetari i Partisë, me autorizim të tij, mund të caktojë një prej Nënkryetarëve të Partisë për të drejtuar Grupin Parlamentar.

4) Grupi Parlamentar i PDSH-së: a) përfaqëson në Parlament PDSH-në dhe siguron aty mbrojtjen e platformës, programit dhe interesave të PDSH-së;

b) harton programin dhe përcakton mënyrën e veprimit e të angazhimit të deputetëve të tij në Parlament dhe në zonat elektorale përkatëse;
c) Rregullorja e funksionimit dhe përfaqësimi institucional i Grupit Parlamentar, miratohet me vendim të Kryesisë së Partisë.