Presidenti gjerman Frank-Walter Steinmeier u rizgjodh të dielën për një mandat tjetër pesë-vjeçar në një post kryesisht ceremonial ku ai duhet të mishërojë një autoritet moral që i kalon linjat partiake.
“Përgjegjësia ime është për të gjithë njerëzit që jetojnë në vendin tonë… Kushdo që lufton për demokracinë do të më ketë mua në krah. Kushdo që e sulmon do të më ketë mua si kundërshtar” – ka thënë Steinmeier në një fjalim pasi pranoi zgjedhjen e tij.
Në detyrë që nga marsi 2017, ish-ministri i jashtëm dhe kandidati për kancelar për Social Demokratët (SPD) u zgjodh me një shumicë të madhe prej 1045 votash nga asambleja e posaçme zgjedhore me 1437 vota, e njohur si Konventa Federale. Trupi zgjedhor mblodhi së bashku anëtarët e dhomës së ulët të parlamentit dhe një numër përfaqësuesish të zgjedhur nga 16 shtetet federale të vendit, duke përfshirë ish-udhëheqësit gjermanë dhe personalitete të caktuara të shoqërisë civile.
Në fjalën e tij, Steinmeier reflektoi gjithashtu mbi krizën e vazhdueshme në Ukrainë, duke thënë se Moska ishte “përgjegjëse” për rrezikun e “luftës” në Evropë për shkak të tensioneve rreth Ukrainës, në prag të një vizite të kancelarit Olaf Scholz në Kiev dhe më pas për në Moskë.
“Ne jemi në mes të një rreziku të konfliktit ushtarak, të luftës në Evropën Lindore dhe është Rusia ajo që mban përgjegjësinë”.
Steinmeier, 66 vjeç, njoftoi se do të kërkonte një mandat të dytë majin e kaluar, përpara zgjedhjeve parlamentare që sollën koalicionin e Scholz në pushtet dhe në një kohë kur shanset e tij për t’u rizgjedhur dukeshin larg të qenit të sigurta. Përpara se të bëhej president, Steinmeier shërbeu dy herë si ministër i jashtëm i kancelares Angela Merkel dhe më parë ishte shef i stafit të kancelarit Gerhard Schroeder. nPresidenti i Gjermanisë ka pak fuqi ekzekutive, por konsiderohet një autoritet thelbësor moral.
Discussion about this post