Këtë të Enjte, Gjykata e Posaçme nuk doli me një vendim për kalimin për gjykim themeli, të dosjes së “Sterilizimit”.
Gjatë seancës së sotme, gjyqtarja Flojera Davidhi pranoi kërkesën e të akuzuarve dhe urdhëroi Prokurorinë që t’i dërgojë ish-ministrit Ilir Beqaj dhe personave të tjerë nën hetim të dosjes së “Sterilizimit”, aktet hetimore mënyrë elektronike.
“Gjykata rrëzoi pengesën artificiale që me qëllim akuza na ka bërë gjithë këto muaj. Urdhëroi akuzën që të na vërë në dispozicion të 602 volumet në versionin elektronik, pa pagesë”, tha Beqaj për mediat pas vendimit.
Ndërkohë, seanca e radhës u caktua më 13 maj, ora 09:00.
Në total, nëntë persona janë marrë të pandehur për procedimin penal. Zyrtari më i lartë nën akuzë është Ilir Beqaj, ish-ministri i Shëndetësisë, në kohën kur u dha koncesioni i sterilizimit, një prej më të kushtueshme të sektorit. Personat e tjerë janë ish-zëvendësi i Beqajt, Klodian Rjepaj, pronari i firmës përfituese të koncesionit nga Ministria e Shëndetësisë, Ilir Rrapaj dhe anëtarë të komisionit të vlerësimit të ofertës.
Nga SPAK, për ish-ministrin e Shëndetësisë Ilir Beqaj, është ngritur akuza e shpërdorimit të detyrës.
“Për veprimet ose mosveprimet që kanë të bëjnë me miratimin dhe nënshkrimin e kësaj kontrate koncensionare, duke i miratuar ato në kundërshtim me rregullat dhe aktet ligjore e nënligjore të zbatueshme për koncesionet, sipas akuzës, rezulton e provuar plotësisht, se ish Ministri i Shëndetësisë, i pandehuri Ilir Beqaj, ka konsumuar elementët e veprës penale të ‘Shpërdorimit të detyrës’, e kryer në bashkëpunim, me Klodjan Rjepajn”, tha Prokuroria e Posaçme, në njoftimin për mbylljen e hetimeve dhe depozitimin në GJKKO të dosjes hetimore bashkë me kërkesën për kalimin e çështjes në gjykim themeli.
Megjithatë, gjatë gjykimit paraprak, Gjykata e Posaçme ka mbajtur një qëndrim kritik ndaj akuzave të prokurorisë, duke konstatuar një lloj amnistie të prokurorëve Edvin Kondili dhe Ened Nakuçi ndaj ish-ministrit Ilir Beqaj, i cili është nën hetim edhe për të tjera çështje të dyshuara korruptive.
A do të kthehet dosja për rihetim?
Hetimet për “Sterilizimin” kanë marrë kritika veçanërisht për rolin që i atribuon Prokuroria ish-ministrit Ilir Beqajt. Opozita ka akuzuar se Beqaj është koka e aferës dhe jo një ministër që veç ka hedhur firmën në allishverishet e përgatitur nga vartësi i tij, siç pasqyrohet në fashikujt e prokurorëve specialë Edvin Kondili dhe Ened Nakuçi.
Një qëndrim jo shumë larg nga ky që vjen nga sfera politika, ka dhënë dhe gjyqtari paraprak i çështjes Erion Bani. Ky i fundit ka sugjeruar se ndaj Beqajt duhet të shtohej edhe akuza penale për veprën penale “falsifikimi i vulave, stampave dhe formularëve” nga personi që ka për detyrë hartimin e tyre, parashikuar nga neni 190, paragrafi i tretë, i Kodit Penal, që parashikon dënimin me burgim nga tre deri në 7 vjet. Po ashtu, ka vlerësuar se ndaj ish-ministrit duhet të caktohej masa e sigurimit të arrestit në burg dhe jo ajo detyrim paraqitjes, që kanë kërkuar prokurorët Kondili e Nakuçi.
Sipas gjyqtarit Bani, krijohet bindja se është pikërisht Beqaj që ka cilësinë e organizatorit të veprimtarisë së dyshuar kriminale.
Sipas gjykatës, ekziston dyshimi i arsyeshëm se me dashje ish-ministri Ilir Beqaj i ka shkaktuar buxhetit të shtetit një dëm në vlerën prej rreth 8.6 miliardë lekësh. “Kjo është pasoja duke prezumuar që vlera e kontratës do të ishte aq sa është njoftuar fillimisht në fillim të procedurës, pasi gjatë zhvillimit të procedurës vlera e kontratës ndryshoi nga vlera totale në shumën 9, 657, 000, 000 (pa TVSH) në një vlerë indikative, ku nuk dihet se sa do të jetë kosto e koncesionit në përfundim të afatit 10 vjeçar,” argumenton gjyqtari, ndërsa shton se pasojat nuk janë vetëm ekonomike, por lidhen edhe me cilësinë e shërbimit jetik sikurse është sterilizimi i sallave operatore që lidhet drejtpërdrejtë me shëndetin e pacientëve.
Hetimi ndërkohë dështon të faktojë dyshimin se paratë e përfituara nga fryrja e kostove të koncesionit shkuan në xhepat e Beqajt dhe zëvendësit të tij. Ndaj asnjë prej të pandehurve nuk është ngritur akuza e korrupsionit.
Nisur nga konstatimet e gjyqtarit paraprak mbi dosjen, e pritshme është që gjykata ta kthejë në SPAK për plotësim të hetimeve.
Discussion about this post