Sterilizimi, Ogerta Manastirliu dy orë në SPAK/ Ja për çfarë u pyet

Ogerta Manastirliu, ministre e Arsimit, është paraqitur sot në SPAK, ku ka qëndruar për rreth dy orë.

Manastirliu është paraqitur rrethy orës 15:00 në SPAK, ku ka qëndruar për mbi dy orë. Ajo është thirrur nga SPAK për të dhënë shpjegime lidhur me çështjen e sterilizimit, gjatë periudhës që ka drejtuar Ministrinë e Shëndetësisë.

Manastirliu është thirrur për të dhënë shpjegime lidhur me koncensionin e sterilizimit, për të cilin po hetohet ish-ministri i Shëndetësisë, Ilir Beqaj, ndërkohë që janë arrestuar ish-zv.ministri Klodian Rrjepaj dhe biznesmeni Ilir Rrapaj.

Nga raportimet mësohet se Manastirliu është thirrur me cilësinë e personit që ka dijeni për çështjen, ndërkohë që gjatë kohës së koncensionit ajo mbante detyrën e Drejtoreshës së QSUT-së dhe më pas zëvendësoi Ilir Beqajn në postin e Ministrit të Shëndetësisë, pas largimit të këtij të fundit.

Më herët në deklaratat publike, Beqaj ka deklaruar se kishte kërkuar nga SPAK thellimin e hetimeve lidhur me koncensionin e sterilizimit, duke hedhur topin te paraardhësit por edhe pasardhësit e tij.