Seanca paraprake për ish-ministrin e Shëndetësisë, Ilir Beqajn dhe të pandehurit e tjerë për dosjen e “Sterilizimit” është shtyrë këtë të hënë për herë të katërt radhazi.
Seanca e radhës pritet të zhvillohet më 26 korrik.
“Gjykata vendosi prej kërkesës së avokatëve dhe personave të tjerë, se dosja është voluminioze, dhe avokatët kërkuan më shumë kohë, seanca e radhës u la për në 26 korrik“, tha ish-ministri i Shëndetësisë, Ilir Beqaj në një prononcim për gazetarët pas seancës.
Më 30 Mars të këtij viti, SPAK mbylli hetimet për dosjen e koncesionit të “Sterilizimit” dhe dërgoi në gjykatë dosjen ndaj 9 personave të vënë nën akuzë.
Mes tyre është dhe ish-ministri i Shëndetësisë, Ilir Beqaj. Ndaj këtij të fundit, prokuroria ka ngritur veprën penale të “shpërdorimit të detyrës”, lidhur me procedurat e dhënies së koncesionit me vlerë 100 milionë Euro, në vitin 2015.
Nga hetimet ka rezultuar se ish-ministri nuk ka evituar konfliktin e interesit me biznesmenin Ilir Rrapaj, fituesin e koncesionit me vlerë 100 milionë Euro dhe nuk ka kërkuar studim të detajuar për nevojat e sterilizimit në mënyrë që të zgjidhte një variant më pak të kushtueshëm.
Në seancat e zhvilluara, gjyqtari paraprak ka qenë kritik ndaj akuzave të SPAK, duke konkluduar një farë amnistie të Prokurorisë së Posaçme ndaj ish-ministrit të Shëndetësisë.
Discussion about this post