Gjykata e Posaçme shtyn për më 12 shtator seancën paraprake ndaj ish-ministrit të shëndetësisë, Ilir Beqaj dhe të bashkëpandehurve të tij të “Sterilizimit”.
Shkak i shtyrjes së seancës u bë mungesa e disa prej avokatëve të të pandehurve.
SPAK ka dyshime për shkelje në procesin e koncesionit të sterilizimit me vlerë 100 milionë euro dhe afat 10-vjeçar të fituar nga biznesmeni Ilir Rrapaj. Prokuroria thotë se në dhënien e koncesionit, të akuzuarit nuk kanë respektuar ligjin dhe kanë shpërdoruar detyrën, ndërkohë që, sipas akuzës, Ilir Beqaj ka pasur njohje dhe miqësi të fortë me biznesmenin.
2 ditë më parë, SPAK hyri me forcë në shtëpinë e tij në Vlorë. Burime nga grupi i hetimit bëjnë me dije se në banesë nuk janë gjetur sende të dyshimta përveç disa shisheve me verë. Edhe pse nga avokati i Beqaj ka pasur një reagim për objektin që nuk është në pronësi të Ilir Beqaj, agjentët e SPAK-ut e kanë kryer kontrollin. Sipas informacioneve, në kontrollet e mëparshme në sendet e Beqaj janë gjetur foto të objektit me të njëjtin arredim.
Ndërkohë, pas kontrollit të banesës deri në orët e pasdites (18:00), agjentët kanë kontrolluar disa garazhe në pallat. Informacionet e grumbulluara bëjnë me dije se ish-ministri parkonte një makinë pikërisht në atë pallat. Një burim tha se gjatë kontrolleve të pronave të ish-ministrit nuk është gjetur një automjet, prandaj po kërkohet edhe në garazhet e pallatit.
Discussion about this post