Stoltenberg takon Osmanin: Sulmet në Veri, të papranueshme

Sekretari i përgjithshëm i NATO, Jens Stoltenberg u takua sot me presidenten e Kosovës Vjosa Osmani në kuadër të turit të tij rajonal.

Në konferencën e përbashkët për shtyp pas takimit, Stoltenberg i cilësoi të papranueshme sulmet e ndodhura në Veri të Kosovës dhe dhunën e përdorur ndaj trupave të KFOR në Leposaviç disa muaj më parë.

Duke folur për sulmin ndaj Policisë së Kosovës më 24 shtator në Banjskë të Zveçanit nga një grup i serbëve të armatosur, Stoltenberg tha se përgjegjësit për sulmin duhet të përballen me drejtësinë.

Ai tha se këtë mesazh do ta përcjellë edhe gjatë takimeve që do të zhvillojë më 21 nëntor në Beograd.

“Në shtator ne pamë një shpërthim serioz të dhunës në veri të Kosovës, që rriti shqetësimet se një konflikt i gjerë mund të rikthehej në Ballkanin Perëndimor. Në maj, trupat tanë të KFOR-it u sulmuan, me ç’rast u plagosën 93 ushtarë, disa rëndë, disa me plagë të përjetshme”, tha Stoltenberg.

“Sulme të tilla të dhunshme janë të papranueshme. Përgjegjësit duhet të përballen me drejtësinë”, shtoi shefi i NATO-s.

Ai u shpreh se NATO u mobilizua menjëherë duke shtuar 1 mijë trupa dhe armatime të rënda më veri të Kosovës.

“NATO ka reaguar me shpejtësi, kemi sjellë 1000 trupa shtesë në Kosovë, kemi sjellë armë më të rënda, do bëjmë çfarë është e nevojshme për të mbajtur mjedisin të sigurt dhe për të siguruar lëvizjen e lirë të qytetarëve. Duhet të zgjedhim diplomacinë mbi dhunën; çdo vendosje e trupave të Kosovës duhet të marrë konfirmimin e NATO-s”, tha Stoltenberg.

Shefi i NATO-s u shpreh më tej se aleanca e mbështet dialogun e lehtësuar nga BE mes Prishtinës dhe Beogradit, dhe të dyja palët duhet të angazhohen në mirëbesim.

“I mirëpres propozimet e fundit për themelimin e asociacionit të komunave me shumicë serbe në Kosovë. Ky do të ishte një hap kyç drejt normalizimit të marrëdhënieve dhe drejt paqes afatgjate dhe të qëndrueshme në rajon”, tha ai.