Policia e Durrësit ka finalizuar me sukses operacionin policor të koduar “STORM 8”, pas një hetimi trejavor të ndjekur me metoda proaktive, me qëllim goditjen e veprimtarisë kriminale të prostitucionit.
Operacioni, i zhvilluar nga Seksioni për Hetimin e Trafiqeve në bashkëpunim me Seksionin për Mbështetjen Operacionale të Hetimit dhe Prokurorinë, çoi në zbulimin e një apartamenti të përshtatur për ushtrimin e prostitucionit, në lagjen nr. 13, në zonën e Plazhit, Durrës.
Si rezultat, u arrestuan në flagrancë dy shtetase kineze, M.Y., 41 vjeçe dhe L.H., 48 vjeçe, për veprat penale “Prostitucion” dhe “Përshtatja e ambienteve për prostitucion”. Gjithashtu, u shpall në kërkim një tjetër shtetase kineze, J.L., 53 vjeçe, ndërsa tre shtetas shqiptarë nga Librazhdi, Durrësi dhe Burreli, të pranishëm në apartament në momentin e kontrollit, u proceduan penalisht në gjendje të lirë.
Sipas Policisë, të arrestuarat kishin marrë me qira dy apartamente: një për banim në zonën e Shkëmbit të Kavajës dhe një tjetër në rrugën “Venecia”, në lagjen Iliria, Plazh, të cilin e kishin përshtatur për zhvillimin e aktivitetit të paligjshëm.
Gjatë kontrollit u sekuestruan si prova materiale: dy pasaporta të shtetaseve kineze, një shumë parash në euro dhe lekë, pesë celularë, nëntë karta bankare të lëshuara nga banka të Republikës së Kinës, si dhe një bllok shënimesh me të dhëna të dyshuara për aktivitetin e paligjshëm.
Policia thekson se të njëjtat shtetase janë arrestuar edhe më parë për veprime të ngjashme penale, po në zonën e Plazhit, në rrugën “Lule Bore”.
Materialet procedurale janë referuar Prokurorisë së Durrësit për veprime të mëtejshme hetimore.
Discussion about this post