Shqipëria ka siguruar një biletë për në Euro2024, ndërsa kryeson Grupin E me 14 pikë, ku ka mbetur edhe ndeshja e fundit, ajo ndaj Ishujve Faroe, që do të luhet mbrëmjen e së hënës në “Air Albania”.
Kombëtarja shqiptare përgjatë 9 muajve nën drejtimin e Sylvinho ka dhuruar gjithçka në fushë, nga fitoret te spektakli. Madje disa nga golat e realizuar nga kuqezinjtë janë cilësuar si ndër më të bukurit e ndeshjeve në grupe, duke tërhequr vëmendjen edhe të UEFA-s.
Në një grup me dy skuadra me emër të madh, Poloninë dhe Çekinë, kombëtarja kuqezi e Sylvinho shkëlqeu, duke i rrëmbyer 3 pikë polakëve dhe 4 çekëve. Po 4 pikë, kombëtarja kuqezi përfitoi nga dy përballjet me Moldavinë.
Nën drejtimin e Sylvinho kombëtarja shqiptare ka vendosur rekordin e pikëve të grumbulluara, ku në 7 takime regjistrohet 1 humbje, dy barazime dhe 4 fitore, me një total prej 14 pikësh.
Me shumë gjasa kuqezinjtë do e mbyllin grupin me 17 pikë, duke pasur parasysh se në ndeshjen e fundit do të kenë përballë Ishujt Faroe, skuadrën më të dobët në grupin E.
Sylvinho i “dhuroi” kombëtares edhe dy zbulimet Mario Mitaj dhe Jasir Asani, tashmë të padiskutueshëm në fushën e lojës, ndërsa thirri rreth 40 futbollistë, për të krijuar më pas një nga skuadrat më kompakte në grup.
Në 7 takimet e luajtura, kombëtarja realizoi 12 gola, me një mesatare 1.7 gola në ndeshje, ndërkohë që ka pësuar vetëm 4. Kjo e ka bërë kombëtaren shqiptare një nga skuadrat me mbrojtjen më të mirë, dhe në fazën e grupeve, ata renditen pas Anglisë, Francës dhe Portugalisë, referuar në golat e pësuar.
Discussion about this post