Ish-deputeti i Partisë Demokratike, Gent Strazimiri ka reaguar pas dorëzimit të 4200 firmave për mbledhjen e Kuvendit Kombëtar të PD. Nga selia blu, Strazimiri është shprehur se kush ka dyshime për verifikimin e firmave, mund të shkojë t’i shohë tek zyra e kryetarit të këshillit kombëtar, Edi Palokës.
“Këshilli Kombëtar, cilido që ka dëshirë mund të shkojë t’i shohë tek zyra e kryetarit të Këshillit Kombëtar, Edi Palokës. E ka 20 hapa më larg zyrën e Palokës që të shikojë firmat, verifikimet i bën vetëm Komisionit i Verifikimit. Çdo interpretim tjetër që i bëhet statutit është efekti i panikut. Ata që mendojnë për të pavërtetët e PD të marrin guximin të shkojnë tek zyrtar e Këshillit Kombëtar të PD. Puç është ai që nuk respekton rregullat e partisë. Të lexosh pikat e statutit të PD që e ka miratuar vetë zoti Basha”, u shpreh Strazimiri
Sipas tij, kanë qenë një shumicë anëtarësh që kanë votuar për mbledhjen e kuvendit.
“Shumica absolute e anëtarëve kanë firmosur për të mbledhur Kuvendin më 11 dhjetor. Kuvendi Kombëtar është organi më i lartë që drejton PD, verifikon të gjitha rastet në çdo vend në botë. Vetë Kuvendi e miraton dhe nëse nuk vetë mblidhet kuvendi, nuk verifikohet nga askush tjetër, verifikohet përmes Komisionit të verifikimit”, tha ai.
Ditën e mërkurë, se selinë e PD, u dorëzuan 4200 firmat e delegatëve të grumbulluara nga “foltorja” e ish-kryeministrit Sali Berisha, me kërkesën për mbledhjen e Kuvendit Kombëtar të PD-së. Firmat u dorëzuar në zyrën e Edi Palokës, në funksionin e kryetarit të Këshillit Kombëtar të Partisë Demokratike.
Discussion about this post