Streha e trafikantëve/ Brenda magazinës së drogës në Lezhë, një në pranga

Operacioni “Next” ka zbuluar magazinën në Lezhë, të cilët trafikantët e përdornin për përgatitjen dhe tharjen e lëndëve narkotike. Policia ka gjetur dhe sekuestruar, brenda magazinës fidanë të dyshuar narkotike në formë boçesh gati për tharje. Menjëherë pas aksionit, policia ka arritur të arrestojë në flagrancë pronarin e magazinës, shtetasin E.Gj, 36 vjeç. Ndërkohë, në kërkim u shpall shtetasi E.M, 32 vjeç, bashkëpunëtor i 36-vjeçarit të arrestuar.

“Finalizohet operacioni policor i koduar “Next”.

Evidentohet dhe shkatërrohet një magazinë e përshtatuar për përgatitjen e lëndëve narkotike.

Goditet dhe 1 rast i kultivimit të bimëve narkotike, në ambient të hapur.

Arrestohen në flagrancë 1 shtetas, shpallet në kërkim 1 shtetas tjetër, të dyshuar si bashkëpunëtorë në këto veprimtari kriminale.

Vihet në pranga 1 shtetas, për moskallëzim krimi, si dhe procedohet në gjendje të lirë kryetari i fshatit, për shpërdorim detyre.

Në vijim të punës për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, shërbimet e Komisariatit të Policisë Lezhë, bazuar dhe në informacionet e siguruara, kanë vijuar kontrollet e imtësishme të territorit, duke përdorur dronë dhe agjentë në terren.

Si rezultat është finalizuar operacioni policor i koduar “Next”, gjatë të cilit, në fshatin Gocaj, njësia administrative Balldre, rrethi Lezhë, në një ambient të mbyllur, të përshtatur si magazinë, në pronësi të shtetasit E. Gj., shërbimet e Policisë kanë gjetur dhe sekuestruar fidanë të dyshuar narkotikë të kultivuar në kubikë, bimë të dyshuara narkotike në proçes tharjeje, si dhe një sasi lënde narkotike në formë boçesh.

Gjithashtu, në vijim të operacionit, në një sipërfaqe toke buzë lumit Drin, në njësinë administrative Kallmet, janë gjetur bimë të dyshuara narkotike, që dyshohet se janë kultivuar nga shtetasi E. Gj.

Në vijim të veprimeve procedurale u arrestua në flagrancë shtetasi E. Gj., 36 vjeç, banues në Gocaj, si dhe u shpall në kërkim shtetasi E. M., 32 vjeç, banues në Balldre, të dyshuar si bashkëpunëtorë në këto veprimtari kriminale.”-njofton policia.