Strehimi i afganëve në Kosovë, duket se ka përforcuar më shumë marrdhëniet e këtij shteti me SHBA-në. Kryeministri i Kosovës, Albin Kurti këtë të hënë ka bërë me dije se ka zhvilluar një bisedë telefonike me Sekretarin amerikan të Shtetit, Antony Blinken.
Kurti përmes një postimi në rrjetin social Twitter shkruan se në fokus të diskutimit me Blinken ka qenë pranimi i refugjatëve nga Afganistani në Kosovë.
“Kënaqësi të flasësh me sekretarin Antony Blinken sot. Ai shprehu vlerësimin e Presidentit Biden për mbështetjen dhe bashkëpunimin tonë. Kosova është e nderuar të ofrojë një mjedis të sigurt dhe të mbrojtur për qytetarët afganë gjatë tranzicionit të tyre. Aleanca jonë me SHBA-në është e palëkundur dhe miqësia jonë po bëhet më e fortë”, ka shkruar në Twitter Kurti.
