Një numër i madh i studentëve të Universitetit Bujqësor në Tiranë kanë bojkotuar mësimin dhe kanë dalë në protestë kundër rritjes së çmimeve në vend. Aktualisht studentët kanë bllokuar qarkullimin te “Kthesa e Kamzës” duke u ulur këmbëkryq në rrugë.
Protestës së studentëve i janë bashkuar dhe qytetarët, duke fikur makinat në mes të rrugës dhe duke u rënë borive. Marshimi i dhjetëra studentëve ka nisur nga Kamza drejt Bashkisë së Tiranës. Ata shprehen për nuk kishin kryer asnjë organizim dhe protesta nuk ishte planifikuar, ndërsa janë të vendosur t’i shkojnë deri në fund kundërshtimit të rritjes së çmimeve.
“Situata mund të përshkallëzojë, ne do i shkojmë deri në fund. Protesta nisi spontanisht, nuk kishim planifikuar apo organizuar gjë”, u shpreh një nga studentët.
Teksa marshojnë duke i bërë thirrje qeverisë për uljen e taksave, qytetarët duartrokasin dhe brohorasin protestën e tyre, ndërsa më herët në protestë dolën dhe studentët në Korçë.
Discussion about this post