Studentët e Universitetit të Mjekësisë kanë goditur me vezë muret e Ministrisë së Arsimit, në shenjë revolte ndaj mospërgjigjes së këtij institucioni.
Një pjesë e studentëve kanë lëshuar vezët në drejtim të dritareve duke thirrur “Ministria e Turpit”.
Ata kanë nisur protestën tek Universiteti i Mjekësisë, duke marshuar në drejtim të Ministrisë së Arsimit.
Ata kanë kërkuar dorëheqjen e zv.ministres së Arsimit, e cila deklaroi në një intervistë, që ata të cilët refuzojnë që të firmosin marrëveshjen, të braktisin studimet.
Studentët janë ngritur sërish në protestë, ndërsa më parë, bllokuan për pak minuta kryqëzimin në zonën e njohur si 9-katëshet në Tiranë.
Ata u ulën këmbëkryq dhe kënduan këngë patriotike dhe himnin e flamurit, ndonëse kundërshtojnë ligjin që i detyron ata të punojnë për 5 vite në atdhe.
Protestës sot ia janë bashkuar dhe qytetarë dhe sipas mediave raportohet se qëndrimi i tyre sot do të jetë i gjatë.
Për dy javë rresht, dhjetëra studentë të mjekësisë kanë bojkotuar mësimin, duke protestuar para Universitetit të tyre si dhe para Kuvendit, ndërsa sot janë zhvendosur para Ministrisë së Arsimit duke kërkuar anulimin e një projekt-ligji, që parashikon punësimin e tyre të detyruar deri në 5 vjet pas përfundimit të studimeve.
Projekt-ligji u kërkon studentëve të mjekësisë që të nënshkruajnë një marrëveshje, sipas të cilës, ata do ta tërheqin diplomën e studimeve pas një punësimi 5-vjeçar në sistemin shëndetësor shqiptar. Por studentët deklaruan gjatë protestës, që nëse nisma nuk anullohet, ata do të bojkotojnë vitin akademik.
Projekt-ligji parashikon një marrëveshje me studentët e Mjekësisë, që ata të punojnë deri në 5 vite brenda vendit pas përfundimit të studimeve, në sektorin publik dhe atë privat. Edhe diplomën ata mund ta marrin vetëm pas punësimit 5 vite në sistemin shëndetësor shqiptar pas mbarimit të studimeve.
Discussion about this post