Skanimet e trurit kanë treguar se Botox-i i injektuar në ballë ndryshon kiminë e trurit të njerëzve dhe ndikon në mënyrën se si ata interpretojnë emocionet e njerëzve të tjerë, sipas një studimi të ri të publikuar në Scientific Reports. Botox është një lëng i injektueshëm që redukton ose eliminon përkohësisht linjat e imta dhe rrudhat në fytyrë. Përdoret për të reduktuar shfaqjen e linjave të vetullave, rrudhave të ballit dhe këmbëve të sorrës rreth syve.
Injeksionet e botoksit janë rritur me 459 për qind që nga viti 2000 për t’u bërë procedura kozmetike më e zakonshme minimalisht invazive. Ndërsa gjithnjë e më shumë njerëz në mbarë vendin vazhdojnë të bëjnë takime për të marrë Botox, studiuesit kanë vënë në dyshim se si paraliza e përkohshme e muskujve të fytyrës nga trajtimi ndikon në aftësinë e një personi për të interpretuar emocionet.
Një studim i ri i bazuar në ‘hipotezën e reagimit të fytyrës’, e cila përmendet shpesh në psikologji, ka deklaruar se botoksi i aplikuar në zonën e fytyrës mund të ndryshojë mënyrën se si truri interpreton dhe përpunon emocionet. Sipas një studimi të kryer në një grup prej 10 pjesëmarrësesh femra të moshës 33 deri në 40 vjeç, parandalimi i linjave të vetullave me injeksione botox pengon gjithashtu mënyrën se si truri përpunon shprehjet emocionale.
Në studimin në SHBA, skanimet e trurit të 10 grave që ishin injektuar me Botox janë kryer para dhe pas procedurës. Gjatë skanimeve, pjesëmarrësve iu kërkua të dallonin mes zemërimit dhe lumturisë nga fotot e fytyrave të të tjerëve. Rezultatet zbuluan se kishte një ndryshim në aktivitetin pas botoksit në pjesët e trurit që lidhen me të kuptuarit e emocioneve, përkatësisht “amygdala” dhe “gyrus fusiform”.
Ekspertët thanë se ndërsa botox parandalon buzëqeshjen dhe vrenjturat, ai gjithashtu dëmton aftësinë e individëve për të lexuar fytyrat. Doktor Fernando Marmolejo-Ramos thotë: “Para se të dërgohen sinjale në rajonet e trurit që interpretojnë emocionet, muskujt tanë të fytyrës kopjojnë në mënyrë të pandërgjegjshme vrenjtën ose buzëqeshjen e tjetrit. Meqenëse Botox i kufizon këto lëvizje, perceptimi është i shtrembëruar.”
Prandaj, botoksi ngrin lëvizjet e muskujve dhe prish koordinimin midis fytyrës, amigdalës dhe gyrusit fusiform. Edhe pse më së shpeshti lidhet me procedurat kozmetike, aftësia e Botox-it për të penguar lëvizjen e muskujve përdoret gjithashtu për të trajtuar migrenën, spazmat e qafës, djersitjen, fshikëzën tepër aktive, sytë dembelë dhe gjendje të tjera të muskujve.
Përshtatur nga Aydinlink.com
Discussion about this post