Studimi nga Prishtina: Shqipërisë i duhen edhe 48 vite që të futet në BE

“Shqipërisë do t’i duhen 48 vjet për t’u anëtarësuar në Bashkimi Evropian ndërsa Kosovës 62 vjet”.

Kështu thuhet në gjetjen institutit EPIK, bazuar në arritjet e shteteve të Ballkanit Perëndimor për përmbushur reformat e kërkuara nga BE për periudhën 2019-2021.

Në hulumtimin “EU Kosovo Scorecard 2021”, Instituti në fjalë ka arritur të kuantifikojnë të gjeturat e Raportit të BE-së për të gjitha vendet e Ballkanit Perëndimor, në kuadër të të gjithë kapitujve të BE-së.

Sipas drejtorit ekzekutiv të këtij instituti, Demush Shasha, qëllimi i projeksionit se vendeve të Ballkanit Perëndimor do të duhet 38 deri në 68 vjet për tu bërë gati për anëtarësim në BE është për të treguar ngadalësinë e zbatimit të reformave evropiane.

“Në këto tre vite vendet e rajonit nuk kanë bërë po thuaj se asnjë përparim serioz në ndërmarrjen e reformave Evropiane. Tre vite janë pothuaj gjysmë dekade”.

Sipas tij fajtor në ngadalësimin e procesit integrues të Ballkanit Perëndimor në BE nuk janë shtetet anëtare të unionit, por elitat politike të Gadishullit.

“Problemi i procesit integrues nuk gjendet në Paris, Hagë apo Berlin – është këtu në mesin tonë në Beograd, Tiranë dhe Shkup. Asnjë vullnet i Macronit apo Merkelit, nuk mund të plotësoj mungesën e vullnetit të Vuçiçit apo Ramës”, vazhdon më tej ai.

Sipas këtij publikimi, Malit të Zi do t’i duhen 38 vjet për tu anëtarësuar në BE, e cila e prinë edhe listën e Institutit EPIK për sa i përket viteve se sa i duhen vendeve ballkanas për tu anëtarësuar në BE.

I fundit në listë gjendet Bosnja dhe Hercegovina, pasi bazuar projeksionit të institutit, Bosnjës do t’i duhen 68 vjet për të qenë pjesë e bllokut.

“Vendet e Ballkanit ndahen në 3 grupe sa i përket përgatitjes për anëtarësim në BE. Në grupin e parë janë Mali i Zi, Serbia dhe Maqedonia e Veriut. Këto vende konsiderohen “lidere” të procesit të zgjerimit. Në grupin e dytë janë Kosova dhe Bosnja të cilat janë në fund të procesit të zgjerimit. Ndërsa, në mesin e këtyre dy grupeve qëndron Shqipëria”, thuhet në publikimin e fundit të Institutit EPIK.