Ngjarja e rëndë që ndodhi mbrëmjen e kësaj të premteje, rreth orës 22:20, ku 4 turistë, 2 burra dhe 2 gra, u gjetën të pajetë brenda një saune në hotelin me 5 yje “Gloria” në Qerret të Kavajës, ka ngritur shumë pikëpyetje rreth arsyes së vërtetë të vdekjes së tyre.
Ndonëse sauna është përgjithësisht e sigurt për njerëz të shëndetshëm, sidoqoftë, në rrethana të rralla, mund të jetë edhe vdekjeprurëse. Shumica e vdekjeve për shkak të nxehtësisë në sauna ndodhin në qershor, shkruan Helsinki Times.
Mesatarisht 30-40 finlandezë vdesin çdo vit nga nxehtësia e saunës. Një arsye për këtë mund të jetë rritja e konsumit të alkoolit i cili është një tjetër faktor rreziku.
“Në vitet 2000 vdekjet më të mëdha në sauna ndodhën në qershor, i cili është gjithashtu muaji kur njerëzit shkojnë më shumë në sauna. Mbi 70 për qind e viktimave kanë qenë të dehur“, thotë Helena Korpi e cila është marrë me këto gjetje.
Edhe një studim zbuloi se gjysma e vdekjeve vjetore në sauna i atribuoheshin alkoolit. Një studim tjetër i botuar në vitin 2008 zbuloi se nga 77 raste të dokumentuara të vdekjeve të lidhura me saunën në Suedi midis 1992 dhe 2003, 44% ishin si pasojë e alkoolit. Kur alkooli nuk është i kontrolluar, lagështia e tepërt mund të shkaktojë vdekjen nga sauna. Sa më shumë grimca uji të ketë në një sauna, aq më shumë ata do të thithin energji, do të vijnë në kontakt me ju dhe do të transferojnë nxehtësinë në trupin tuaj. Kjo mund të shkaktojë djegie të lëkurës dhe indeve të tjera trupore.
Në të vërtetë, të vdesësh në një sauna mund të jetë e tmerrshme. Lëkura e viktimave shpesh edhe mund të digjet nga brenda. Sidoqoftë, vlen të përmendet se vdekja nga sauna është jashtëzakonisht e rrallë.
