Komisioni Ndërkombëtar për Personat e Zhdukur organizoi sot në Universitetin e Shkodrës një takim mbi nevojen e angazhimit publik për t’u ballafaquar me krimet e periudhës së komunizmit në Shqipëri.
Siç njofton korrespondenti i Zërit të Amerikës, Pëllumb Sulo, studiuesit veçuan faktin se tranzicioni i gjatë, niveli i korrupsionit dhe dështimi i shtetit për të përmbushur nevojat e qytetareve po ringjallin nostalgjinë për të kaluarën.
Studiuesit që morën fjalën në takimin e organizuar sot në Universitetin e Shkodrës nga Komisioni Ndërkombëtar për Personat e Zhdukur theksuan faktin se, e kaluara e periudhës së komunizmit vazhdon të jetë një nga çështjet më të debatuara midis të majtes dhe të djathtës në Shqipëri.
Rektori Universitetit të Shkodrës, profesor Tonin Gjuraj, tha se shoqëria shqiptare ka nevojë të përballet me të kaluarën, të dënojë krimet e komunizmit dhe se tranzicioni i gjatë dhe konfliktual i ka rrënjët në qendrimin ndaj të kaluarës.
“Në një masë të konsiderueshme qëndrimet dhe sjelljet që ne kemi sot për tranzicionin demokratik dhe për demokracinë në tërësi i kanë rrënjët tek e kaluara jonë. Dhe, nëse ne nuk kemi guximin publik të përballemi me krimet e komunizmit dhe me të kaluarën, ne do të detyrohemi pastaj të socializohemi me një kulturë që e harron të kaluarën”.
Për profesor Albert Rakipin, i cili drejton Institutin Shqiptar për Studimet Ndërkombëtare, mungesa e vullnetit politik, nga partitë që qeverisën vendin pas pariudhës së komunizmit, ka penguar ballafaqimin e plotë me të kaluaren komuniste. Ndaj, shtoi ai, kultura e totalitarizmit, që u kultivua për më shumë se 40 vjet gjatë komunizmit, vazhdon edhe sot në forma të ndryshme.
“Kemi një konflikt politik në Shqipëri që nga 90-ta e deri tani, i cili vetëm zgjerohet, i cili në fakt minon ndërtimin e një shteti dhe shoqërie demokratike. Pra, është e domosdoshme që të ndahemi me kulturën totalitare. Për fat të keq, konstatojmë nga të gjitha krahët se, të rinjtë që merren me politikë vazhdojnë me ndasitë, gjendjen e konfliktit dhe asgjësimit të kundërshtarit”.
Tranzicioni i gjatë dhe i vështirë si dhe mungesa e dënimit të krimeve të komunizmit, sipas profesor Rakipit, po nxisin ringjalljen e nostalgjive për periudhën e komunizmit në Shqipëri.
“Kemi bërë studime të ndryshme, që lidhen me perceptimin që kanë qytetarët për arsimin sot, për shëndetësinë, shërbimet bazë, të cilat një shtet supozohet t’u sigurojë qytetarëve. Dhe, qytetarët të lodhur nga kjo amulli, nga nivelet e korrupsionit dhe nga dështimi i shtetit për të siguruar gjërat themelore që një shtet siguron për qytetarët, atëherë kujtojnë me nostalgji kohën e komunizmit ”.
Pjesëmarrësit në takimin e organizuar nga Komisioni Ndërkombëtar për Personat e Zhdukur theksuan nevojen e një ballafaqimi të plotë të shoqërisë shqiptare me të kaluarën, reflektimin ndaj saj, si dhe një përpjekje më të madhe për t’a dokumentuar dhe trajtuar atë në studime, shkolla, dhe në kulturë./ VOA
Discussion about this post