I gjithë vendi ynë është përfshirë sot nga reshje shiu me intensitet të lartë dhe stuhi dëbore, çka ka bërë që disa qytete të bllokohen dhe të përmbyten. Zonat më problematike janë ato në veri dhe në jug të vendit, ku regjistrohen gjithashtu temperatura shumë të ulëta.
Në qarkun e Dibrës, reshjet e dëborës janë intensive dhe zonat e thella si Kalaja e Dodës, Lurë e Selishtë arrin deri në 40 Centimetra dhe ka mungesë energjie elektrike. Lëvizja e makinave në aksin Klos-Trianë përmes rrugës së Arbrit bëhet vetëm me zinxhirë në By passin e Qafë Murrizit. Qarkullimi është i vështirë edhe në akset e tjera kombëtare, ku ARRSH tregon se makinat nuk mund të kalojnë pa zinxhir.
Reshje dëbore ka në të gjithë qarkun e Kukësit, duke arritur 15 cm në Shishtavec, 20 cm në Valbonë dhe 15 Cm në Has. Për pasojë rruga e Arrënit është e bllokuar, ndërsa shumë akse të tjera janë të kalueshme vetëm me zinxhirë. Sakaq, bëhet me dije se në qarkun e Shkodrës trashësia e dëborës ka arritur në 70 cm, në qafën e Bërdolecit, në rrugën e Vermoshit ku qarkullimi është gati i pamundur. E rëndë paraqitet situata edhee në fshatrat Vermosh e Lepush, të cilët prej mëngjesit nuk kanë energji elektrike.
Në Pukë trashësia e dëborës shkon mbi 15 cm, e për pasojë ka probleme në rrugët e zonave të thella. Në qarkun e Lezhës, 150 hektarë tokë janë me prezencë uji në Zonën e Kënetës së Kakariqit. Mësohet se, reshjet e dëborës kanë vijuar edhe në juglindje. Në Dardhë, trashësia arrin 35 cm dhe mjetet mund të lëvizin vetëm me zinxhirë.
Dëbora që ka arritur deri në 25 cm ka izoluar dhe ka lënë pa energji fshatrat e thella të Pogradecit. Për pasojë janë krijuar vështirësi në lëvizjen e automjeteve në Qafë Thanë, por aksi nuk është i bllokuar. Në Gjirokastër, Përroi Çullos dhe Liqeni Viroit dolën nga shtrati duke krijuar vështirësi, ndërsa rrëshqitje dherash pati edhe në aksin nacional Përmet-Çarçovë-Korçë.
Në qarkun e Durrësit, rruga Lalez-Bizë në njësinë Ishëm ka pësuar shembje në disa pika të saj. Reshjet intensive të shiut kanë shtuar prurjet e lumenjve ku Shushica dhe Vjosa janë në kuota maksimale dhe rrezikojnë përmbytje. Reshjet e shiut kanë shtuar prurjen e lumenjve, por deri më tani të gjithë janë brenda shtratit natyror.
Discussion about this post