Të paktën 16 persona kanë humbur jetën si pasojë e stuhive të forta dhe përmbytjeve që kanë goditur rajonet e Midwest dhe Jugut të Shteteve të Bashkuara. Tragjedia përfshin edhe dy fëmijë, duke rritur shqetësimin për përmasat e dëmeve të shkaktuara nga moti ekstrem.
Një djalë 9-vjeçar në Kentaki u mor nga përmbytjet e furishme teksa po shkonte drejt stacionit të autobusit, njoftoi policia lokale. Ndërsa në Little Rock të Arkansas-it, një fëmijë 5-vjeçar humbi jetën në shtëpinë e tij si pasojë e kushteve të rënda atmosferike, sipas raportimeve të CNN.
Reshjet e dendura vazhdojnë të bien në pjesë të Arkansas qendrore dhe lindore, si dhe në Tenesin perëndimor. Në Arkansas, niveli i reshjeve të rëna brenda pak ditësh ka qenë i barabartë me atë që zakonisht bie në një periudhë tre mujore, çka ka çuar në përmbytje të paprecedente dhe dëme të mëdha infrastrukturore.
Stuhitë kanë shkaktuar gjithashtu ndërprerje të mëdha të energjisë elektrike, duke lënë dhjetëra mijëra banorë pa furnizim në të gjithë rajonin. Përveç kësaj, janë raportuar vonesa në mbi 6,000 fluturime brenda dhe jashtë SHBA-së gjatë së shtunës, duke shkaktuar kaos në transportin ajror.
Shërbimi Kombëtar i Motit ka lëshuar paralajmërime për tornado në pjesë të Luginës së Tenesit dhe Misisipit të Poshtëm. Sipas autoriteteve meteorologjike, zona me rrezik më të lartë – niveli 3 nga 5 – përfshin më shumë se 10 milionë banorë, nga perëndimi i Nashville deri në veri të Hjustonit.
Autoritetet vijojnë të monitorojnë situatën dhe i kanë bërë thirrje qytetarëve që të ndjekin udhëzimet e sigurisë dhe të shmangin lëvizjet e panevojshme në zonat më të rrezikuara.
Discussion about this post