Sindikata e Sektorit Privat i kërkon Qeverisë së Kosovës që punëtorët e këtij sektori të subvencionohen direkt nga shteti. Kjo për faktin pasi sipas tyre, 95 për qind e punëtorëve në sektorin privat nuk do të jenë në gjendje të përfitojnë nga paketa e qeverisë.
Këtë kërkesë ia adresuan edhe përmes një letre zyrtare kryeministrit Albin Kurti. Mirëpo, edhe pas 7 ditësh Sindikata e Sektorit Privat nuk kanë marrë asnjë përgjigje nga shefi i ekzekutivit.
“Realisht ne nuk kemi marrë asnjë informacion nëse që është pranuar kërkesa jonë. Vetë fakti që në momentin kur nuk kthen një përgjigje pozitive në mënyrë automatike nënkuptohet që kërkesa refuzohet. Kështu mundemi me kuptu që dje janë bërë 8 ditë prej që i kemi shkruar zyrtarisht dhe ata nuk kanë kthyer përgjigjeje, konsiderojmë që ata duan që në heshtje me kalu këtë.”
Megjithatë, sipas tij, punëtorët e Sektorit Privat nuk do të heqin dorë nga kërkesat e tyre. Nga ana tjetër, Azemi thotë se do të presin deri në datën 20 shator 2022, pastaj do të shqyrtojnë nëse do të hyjnë në ndonjë grevë.
“Ne kemi marrë vendim që të presim deri më 20 të këtij muaji, dhe të shohim se si po veprojnë të dyja palët, edhe Qeveria edhe punëtorët e këtij sektori. Nëse ata vendosin që të futen në grevë. Por, po shihet që kushtëzimin e ka bërë me qëllim, pasi që nuk po e bënë më të mirën më të vogël kundrejt punëtorëve të sektorit privat.”
Kryeministri Albin Kurti kishte bërë të ditur se duke filluar nga ky muaj për zyrtarët publikë do të ndajnë shtesën prej 50 euro, kurse për punëtorët në ndërmarrjet publike do të ndajnë shumën e njëhershme prej 100 euro. Për punëtorët e sektorit privat është thënë se do t’i subvencionojnë rritjet e pagave për vetëm tre muaj. Ai njoftoi se për pensionistët do të ndajnë shumën e njëhershme prej 100 euro (në tetor), ndërkohë familjet në asistencë sociale do t’i mbështesin duke dyfishuar shumën e asistencës për një muaj.
Discussion about this post