Skenar i mirëpërgatitur për të rikthyer Lulzim Bashën në krye të PD-së zyrtare, e ka cilësuar deputeti demokrat Dashnor Sula, lojën e bërë nga Enkelejd Alibeaj, i cili për më shumë se 1 vit mbajti funksionin e kryetarit të komanduar në këtë parti.
Sula tha se ka mbështetur nga 2005 Sali Berishën, më pas mbështeti Lulzim Bashën, por sot PD-së i duhet një figurë e re, nuk i duhet as Berisha dhe as Basha si kryetar.
I ftuar në “Open” në News24 Sula u shpreh se ndihet i zhgënjyer nga Enkelejd Alibeaj, për të cilin tha se u shndërrua në një patericë për të kthyer partinë në situatën fillestare.
Sula tha se është e turpshme ajo që po ndodh në PD ku Taulant Zeneli i çon mesazh Sekretarit të Përgjithshëm, Gazment Bardhi duke i thënë: “z. anëtar i Këshillit Kombëtar jeni i ftuar në mbledhje”. “Do i them të gjitha, do i nxjerr ujin e zi këtyre se janë gjëra të turpshme”, tha Sula.
“Kur të ndodhë ajo katastrofë në vitin 2025, do të shohim kush e ka pasur fajin për vendosjen e regjimit të Edi Ramës. Unë ndihem i shfrytëzuar në naivitetin tim. Bashës bravo i qoftë për skenarin që përgatiti, Alibeaj më ka zhgënjyer shumë duke u shndërruar në një patericë për t’u kthyer në situatën ku ishim në fillim.
Unë kam kërkuar që PD të hynte në zgjedhje për çdo rol dhe kjo binte në vesh të shurdhët. Mendoja se Alibeaj mund të ishte kreu i ri i PD-së gjatë asaj kohe. Gjithçka ka qenë një skenar për t’ia lënë në pjatë të argjendtë Bashës.
Jam kundër Bashës pasi po zgjidhet për herë të katërt dhe do humbë për herë të pestë. Opozitës i është dashur një bashkim real dhe lidership i ri. Nëse do rrimë në situatën ku jemi, ju garantoj se në vitin 2025 Rama nuk ka nevojë të diskutojë për shumicën. Edhe Berisha edhe Basha janë humbës”, u shpreh Sula.
Discussion about this post