Deputeti demokrat, Dashnor Sula ka deklaruar se Sali Berishën me Gazment Bardhin e bashkoi Lulzim Basha.
I ftuar në “Neës Line”, Sula tha se Basha bëri shumë keq, pasi krijoi ndasi brenda partisë. Sipas tij, të kthehet një kryetar që ka humbur të gjitha herët, nuk funksionon.
“Po, dorën e fundit e dha Basha. Sepse unë të paktën me kolegët e mi kemi besuar që pas 30 prillit të 2022, kur Berisha përfundoi zgjedhjet brenda institucionit të Rithemelimit, unë kam qene ndër ata që kam kërkuar me forcë sinqerisht, ndërkohë, që kishim dhe kartën morale të fortë, nuk kishim as logon, ishim një grupim i ri. Kishim le të themi një kryetar në detyrë që ishte zoti Alibeaj, që për hir të së vërtetës ndjejë një zhgënjim nga sjellja, nga qasja e tij politike sepse ka qene një shpirt opozitar, por nuk e di ku është kapur që dështoi deri në këtë pikë.
Pse e them këtë gjë? Sepse për sa kohë Zoti Berisha bëri një zgjedhje për ato 40 mijë vota, sa ishin atëherë, do të ishte organizuar Partia Demokratike. Të njëjtën gjë bëri tani Basha, por e bëri shumë herë më keq, shumë herë më pak dhe ndasitë u bën dhe më të mëdhaja. Edhe aq më tepër të kthehet një kryetar që ka humbur të gjitha herët, të gjashta në mos gaboj, atëherë kjo nuk shkon dhe nuk funksionon”, u shpreh ai.
Takimin ku ishin prezent 43 deputetë, Sula e konsideron si një zhvillim shumë pozitiv. Ai ka theksuar se emëruesi i përbashkët i opozitarëve të Rithemelimit dhe PD-së zyrtare është keqqeverisja e mazhorancës.
“Dua të them që ka një realitet të ri, fatmirësisht nga 1 shtatori 2021 dhe unë këtë nuk e them për diçka të përfitimit personal, apo për axhendën time politike personale, si përfitues që mund të kemi në lëvizjet politike që mund të ndodhin brenda opozitës, po për ta thënë troç, qenia apo mosqenia në Partinë Demokratike mbas dy vitesh. Po e shikoj si gjë jashtëzakonisht të mirë, për frontin opozitar, demokratët dhe për gjithë shoqërinë shqiptare.
Sepse nëse ne nuk do të kishim një opozitë, e cila do të ishte rojtare, le të themi, e gabimeve apo qeverisja deri diku e mazhorancës, apo më keq të korrupsionit dhe qeverisjes të keqe, unë do të thosha që është dhe faji i opozitës. Edhe kjo ndodh dhe për shkak të përçarjes dhe gabimit që kishte opozita. Në momentin që kemi një opozitë të bashkuar dhe të unifikuar, që kërkon gjërat më me qetësi brenda vetes së vetë dhe shikon që do të duhet një front i fortë opozitar përballë një qeverisje, e cila është sot kjo mazhorancë, unë them është pozitivitet. Pastaj çfarë na ndan dhe çfarë qasje kemi, emëruesin e përbashkët, këto janë për t’u parë. Unë në mendimet e mia për zotin Berisha apo për zotin Basha për pjesën që janë pranë zotit Basha nuk kam asnjë lloj mendimi. Por kemi një emërues të përbashkët që keqqeverisja e kësaj mazhorance”, u shpreh Sula.
Discussion about this post