Ukraina pretendon se ka goditur më shumë se 40 bombardues rusë, në atë që duket të jetë një nga sulmet më të guximshme deri më tani ndaj aviacionit rus, raporton BBC.
Sipas një deklarate nga shërbimi i sigurisë së Ukrainës, SBU, “bombarduesit strategjikë të armikut po digjen masivisht në Rusi”.
Ajo thotë se Ukraina po kryen “një operacion special në shkallë të gjerë që synon shkatërrimin e avionëve bombardues të armikut”. Ajo thotë se më shumë se 40 avionë janë goditur.
Ajo ka publikuar një video dramatike e cila thotë se tregon një sulm me dron në bazën ajrore Belaya në Irkutsk oblast, në Siberi. Bombarduesit janë nën sulm, me shpërthime të dukshme dhe tym që ngrihet.
Raportet sugjerojnë se avionë të tjerë janë sulmuar në bazën ajrore Olenya, pranë Murmansk. Media ruse po raporton sulmin në Murmansk, por thotë se mbrojtja ajrore po funksionon. Sulmi në Irkutsk po raportohet gjithashtu.
Ndërkohë, autoritetet ukrainase thonë se 472 dronë dhe shtatë raketa balistike dhe lundruese u përfshinë në valën e sulmeve të natës së kaluar ndaj Ukrainës. Ky duket të jetë një nga sulmet më të mëdha të vetme me dron rus deri më tani. Ukraina thotë se neutralizoi 385 objektiva ajrore.
Burime të sigurisë ukrainase i thanë Kyiv Post se operacioni special – me emrin e koduar “Rrjeta” – kishte në shënjestër bazat ajrore Belaya, Diaghilevo, Olenya dhe Ivanovo.
Sipas tyre, bombarduesit me rreze të gjatë veprimi Tu-95 dhe Tu-22M3 – të përdorur në sulmet e përditshme ajrore ndaj Ukrainës – si edhe një avion i tipit A-50 janë dëmtuar ose shkatërruar.
Burimi e cilësoi këtë si një “pikë kthese” në luftë dhe tha se “mosndëshkueshmërisë së Rusisë i ka ardhur fundi”.
Një zyrtar tjetër ukrainas i sigurisë i tha Reuters se shërbimi sekret SBU kishte ndërmarrë një sulm të gjerë me dronë ndaj bombarduesve strategjikë Tu-95 dhe Tu-22 – të cilët Rusia i përdor për të lëshuar raketa me rreze të gjatë ndaj Ukrainës.
gijotina.com/
Discussion about this post