Katër të rinj shqiptarë janë arrestuar dy ditë më parë në Bolzano të Italisë. Siç shkruajnë mediat e huaja, ata akuzohen për pjesëmarrje në një përleshje të dhunshme të ndodhur më 1 maj si dhe armëmbajtje pa leje.
D.A., 20 vjeç, G.R., 21 vjeç, L.E., 19 vjeç dhe M.A., 20 vjeç, thuhet se kanë pasur një debat verbal brenda një diskoteke, i cili ka agravuar deri në plagosjen e rëndë të dy personave. Mësohet se pasi stafi i sigurisë i ka shoqëruar jashtë diskotekës, ata u kanë zënë pritë të rinjve duke i sulmuar me thika, shufra hekuri e zinxhirë.
Hetuesit kanë arritur t’i identifikojnë në sajë të dëshmive dhe pamjeve të kamerave të sigurisë në qytet. Njëri nga shqiptarët u arrestua teksa punonte në një kantier, ndërsa të tjerët në banesat e tyre, ku u gjetën edhe prova të tjera materiale.
Shefi i Policisë së Bolzanos, Paolo Sartori ka lëshuar urdhra dëbimi nga territori kombëtar për secilin prej tyre, duke e veçuar këtë ngjarje nga sherret e zakonshme nëpër klubet e natës.
“Rezultatet e hetimeve të kryera nga Policia e Shtetit, të koordinuara me Prokurorinë, si dhe zbatimi i shpejtë i masave të urdhëruara nga Autoriteti Gjyqësor, kanë qenë vendimtare për të parandaluar përsëritjen e veprave penale me pasoja shumë të rënda, që krijojnë shqetësim shoqëror dhe cënojnë bashkëjetesën qytetare. Objektivi ynë është të garantojmë nivelin më të lartë të ligjshmërisë në Bolzano, duke i bërë qytetarët të ndjejnë afërsinë dhe angazhimin e institucioneve”, është shprehur Sartori.
Discussion about this post