Sulmet e 11 Shtatorit, presidenti Begaj: Kërcënimi i terrorizmit nuk është zhdukur

Presidenti Bajram Begaj ka reaguar në lidhje me 23-vjetorin e sulmeve terroriste në SHBA.

Në një postim në rrjetet sociale, Begaj shkruan se sot nderohen viktimat por edhe forca e qëndrueshmëria e popullit amerikan, në atë ngjarje që tronditi botën.

Postimi:

Sot, kujtojmë ngjarjet tragjike të 11 Shtatorit, 2001. Njëzet e tre vjet më parë, bota u trondit nga sulmet e paimagjinueshme që morën jetën e mijëra njerëzve të pafajshëm në SHBA.

Në këtë ditë, nderojmë viktimat por edhe forcën e qëndrueshmërinë e popullit amerikan. Kjo ditë shërben gjithashtu si kujtesë për luftën e vazhdueshme kundër terrorizmit. Kërcënimi i terrorizmit nuk është zhdukur; ai nuk njeh ngjyrë apo ideologji. Nuk duhet të harrojmë kurrë këtë!

Ndërkohë, edhe ministri për Evropën dhe Punët e Jashtme i Shqipërisë, Igli Hasani, teksa ka kujtuar këtë ngjarje tragjike shprehet se vendi ynë qëndron përkrah SHBA.

“Sot nderojmë kujtimin e jetëve të pafajshme të humbura në sulmet e 11 shtatorit 2001 dhe reflektojmë mbi guximin, dhembshurinë dhe solidaritetin që u shfaq në përgjigje të tyre. Shqipëria qëndron përkrah aleatit të saj strategjik, Shteteve të Bashkuara të Amerikës, në luftën kundër terrorizmit dhe mbrojtjen e të drejtave të njeriut, vlerave demokratike, stabilitetit dhe paqes”, shkruan ai.