Që prej arrestimit të Erion Veliajt, në mediat pranë këtij të fundit ka patur me dhjetra artikuj, ku në shënjestër të sulmeve kanë qenë prokurori i SPAK, Ols Dado, si dhe gjyqtari i GJKKO-së, Erjon Bani, dy magjistratët që çuan në burg kryebashkiakun e Tiranës.
Lidhur me këto sulme nga mediat kanë ardhur reagime nga Këshilli i Lartë i Prokurorisë dhe Këshilli i Lartë Gjyqësor, ku kërkojnë që gazetarët t’i përmbahen etikës, duke mos cënuar dinjitetin njerëzor, të familjes dhe të jetës private të magjistratëve.
“Etiketimet e përdorura, vlerësimet e njëanshme, pa shqyrtime të kujdesshme dhe objektive, siç e kërkon gazetaria profesionale, devijojnë raportimin e paanshëm dhe të balancuar nga media. Kjo mund të sjellë një informim jo-profesional dhe cenim të besimit të publikut tek drejtësia.” – thuhet në reagimin e KLP-së.
Ndërkohë, KLGJ shprehet se dhënia e drejtësisë duhet të jetë e çliruar nga çdo lloj ndikimi apo ndërhyrjeje nga subjektet publike apo private, duke garantuar paanshmërinë e sistemit gjyqësor në shërbim të interesit publik.
Reagimi i KLP:
Këshilli i Lartë i Prokurorisë vlerëson misionin e medias së pavarur për informimin e publikut, duke respektuar parimin e objektivitetit dhe atë të mos cenimit të dinjitetit njerëzor, të familjes dhe mbrojtjes së jetës private.
Me qëllim që të garantohet autoriteti dhe paanshmëria e sistemit të drejtësisë, Këshilli i Lartë i Prokurorisë i bashkohet qëndrimit të Këshillit të Lartë Gjyqësor në mbështetje të të gjithë prokurorëve të Republikës së Shqipërisë, lidhur me disa raportime mediatike që mund të rezultojnë në cenim të integritëtit dhe pavarësisë së tyre.
Etiketimet e përdorura, vlerësimet e njëanshme, pa shqyrtime të kujdesshme dhe objektive, siç e kërkon gazetaria profesionale, devijojnë raportimin e paanshëm dhe të balancuar nga media. Kjo mund të sjellë një informim jo-profesional dhe cenim të besimit të publikut tek drejtësia.
Drejtësia e pavarur dhe profesionale duhet të prevalojë në çdo rast, ndaj nxisim bashkëpunimin me median për një raportim të drejtë, të balancuar dhe të verifikuar.
Reagimi i KLGJ:
Këshilli i Lartë Gjyqësor, në përputhje me qëndrimet e tij të vazhdueshme në mbrojtje të magjistratëve, ka konstatuar publikimin dhe transmetimin nga një grup mediatik, të materialeve që përmbajnë aludime dhe përcaktime që cenojnë dinjitetin e gjyqtarëve që ushtrojnë funksionin pranë Gjykatës Administrative të Apelit, si dhe të familjarëve të tyre.
Këshilli vlerëson rolin e medias si një komponent thelbësor në një shoqëri demokratike, ku informimi i publikut duhet të realizohet në mënyrë të paanshme dhe profesionale. Media ka detyrimin të respektojë parimet e etikës dhe të shmangë publikimet që synojnë dëmtimin e besimin e publikut te sistemi i drejtësisë. Në këtë kontekst, Këshilli thekson rëndësinë e raportimeve të bazuara në fakte të verifikuara dhe të trajtuara me objektivitet, duke shmangur krijimin e perceptimeve të pasakta apo të dëmshme për gjyqtarët dhe familjarët e tyre.
Këshilli i Lartë Gjyqësor fton edhe njëherë të gjithë aktorët që të respektojnë pavarësinë e gjyqtarëve dhe angazhimin e tyre në forcimin e shtetit të së drejtës. Dhënia e drejtësisë duhet të jetë e çliruar nga çdo lloj ndikimi apo ndërhyrjeje nga subjektet publike apo private, duke garantuar paanshmërinë e sistemit gjyqësor në shërbim të interesit publik.
Discussion about this post