57 persona janë vrarë dhe të paktën 169 të tjerë kanë mbetur të plagosur kur ende nuk janë bërë 24 orë nga lufta që Rusia ka nisur në Ukrainë. Shifrat janë bërë me dije nga Ministria e Shëndetësisë e Ukrainës, raporton CNN. Sulmet vijojnë ende dhe numri i të plagosurve e të vrarëve rritet në çdo moment.
Presidenti rus Vladimir Putin lëshoi raketat gjatë orëve të para të mëngjesit duke shkaktuar viktimat dhe të plagosurit e parë në Ukrainë, mes tyre edhe civilë. Ndërsa paralajmëroi se pushtimi i të gjithë vendit ishte plani i tyre. Javët e ushtrimit të diplomacisë intensive dhe vendosja e sanksioneve perëndimore ndaj Rusisë nuk arritën ta pengonin Putinin, i cili kishte grumbulluar rreth 150,000-200,000 trupa përgjatë kufijve të Ukrainës. Mesa duket Rusia nuk e ka “gëlltitur” dot zgjerimin e NATO-s drejt lindjes duke pretenduar se anëtarësimi i Ukrainës në aleancën ushtarake Atlantike të udhëhequr nga SHBA ishte i papranueshëm.
Pushtimi duket sikur u paralajmërua të hënën kur Putin njohu dy rajone separatiste si të pavarura dhe urdhëroi vendosjen e atyre që ai i quajti “paqeruajtës” në territorin e tyre. Një lëvizje që Perëndimi e quajti fillimin e një pushtimi. Si përgjigje, vendet perëndimore dhe Japonia kanë vendosur sanksione ndaj bankave dhe individëve rusë. Ndërsa Gjermania ndërpreu marrëveshjen për “Nordstream2”.
Discussion about this post