Misioni i Përhershëm i Iranit në Kombet e Bashkuara i ka dorëzuar një letër urgjente Këshillit të Sigurimit, duke dënuar ashpër sulmet e fundit të Shteteve të Bashkuara ndaj impianteve bërthamore iraniane. Në dokumentin zyrtar, autoritetet iraniane e cilësojnë bombardimin si një akt “të paligjshëm dhe të pamatur”, duke akuzuar SHBA-të për përdorim të qëllimshëm të forcës kundër sovranitetit të Republikës Islamike.
Sipas Teheranit, sulmet u kryen në orët e para të 21 qershorit mbi objektet e Fordow, Natanz dhe Isfahan, në koordinim të plotë me Izraelin, i cili po bombardonte infrastrukturën civile dhe objektet bërthamore të Iranit që nga data 13 qershor.
Në letër theksohet se aktet e ndërmarra nga SHBA përbëjnë “një kërcënim serioz për paqen dhe sigurinë ndërkombëtare” dhe se shkelin hapur Kartën e OKB-së, Traktatin për Mospërhapjen e Armëve Bërthamore (NPT), si dhe disa rezoluta të Këshillit të Sigurimit dhe Agjencisë Ndërkombëtare për Energjinë Atomike (IAEA).
“Republika Islamike e Iranit kërkon që Këshilli i Sigurimit të mblidhet urgjentisht për të adresuar këtë akt të paligjshëm agresioni, për ta dënuar me termat më të fortë të mundshëm dhe për të siguruar që autorët të mbahen përgjegjës dhe të mos mbeten të pandëshkuar”, thuhet në letrën e dorëzuar.
Discussion about this post