Sulmi me 11 të vrarë në Suedi, kush është 35-vjeçari vetmitar që tmerroi vendin

Personi që shihni në foto është 35-vjeçari Rickard Andersson, autori i vrasjes së 10 personave në Suedi. Gazeta suedeze “Expressen” publikoi identitetin e sulmuesit, i cili ishte një emër i panjohur për Policinë. Po ashtu, nuk dihet as motivi i masakrës. Për të zbuluar më shumë detaje për vrasësin, i cili ka qelluar edhe veten, Policia i ka shkuar në banesë dhe po kryen disa kontrolle.

“Ai ishte jashtëzakonisht i çuditshëm,”- tha një nga të njohurit e tij. “Expressen” suedeze shkruan se sulmuesi 35-vjeçar ka lindur në Suedi dhe të dy prindërit e tij janë suedezë.

Kushëriri i tij zbuloi detaje të panjohura për sulmuesin. Ai shton se nuk ndihej mirë mendërisht, dhe se Krishtlindjet nuk i kishte kaluar me prindërit.

“Nuk i pëlqenin mbledhjet, disi e acaronin. Ai nuk donte të ishte me ne kur ishim shumë persona bashkë, kështu që duhej të ishim vetëm pak që ai të bashkohej me ne. Nuk shkoi as tek prindërit për Krishtlindje. Nuk ishte mirë mendërisht,“- tha ai.

I afërmi gjithashtu tregoi se Andersson ka qenë viktimë e abuzimit në shkollën fillore. Por shumë pak detaje ka për të. Dihet se Andersson nuk ka qenë i martuar, nuk ka fëmijë dhe nuk ka qenë i punësuar nga shteti apo komuna. Ai u largua nga shtëpia në vitin 2010, në moshën 21-vjeçare dhe mori me qera një apartament në qendër të Örebro-s. Një vit më pas ai u shpërngul përsëri, në një apartament disa kilometra larg, në Storgatan. Që atëherë ai ka jetuar atje. Ai më së shumti rrinte zgjuar natën duke parë televizor. I pëlqente të voziste dhe dikur aplikoi për një punë si shofer kamioni, por nuk ia doli.

Në vitin 2014, ai fitoi 98,605 korona, sipas Agjencisë Suedeze të Taksave. Që atëherë, shifra e fitimeve ka qenë e njëjtë: 0 – deri në vitin 2023.

35-vjeçari është autori i vrasjes së 10 personave në një sulm masiv në Suedi. I riu hapi zjarr dje në shkollën Campus Risbergska në Orebro, duke i marrë jetën disa personave dhe duke plagosur disa të tjerë. Pasi kreu aktin e rëndë, i dha fund edhe jetës së tij. Ky ishte sulmi masiv më i rëndë që ka ndodhur në historinë e Suedisë.